«Премьер-министр Кәрiм Мәсiмовтiң жүрiс-тұрысында соңғы кездерi бiр бөтендiк бар. Ақордадан аттап шықпайтын Мәсiмов жаз бойы облыстарды аралап жүр. Барған жерiнде рухани, мәдени мәселенi көтередi»,- деп жазады «Жас Алаш» газетінің Оңтүстік Қазақстан, Жамбыл облыстарындағы тілшісі Ғалымжан Елшібай.

Премьер-министрдің бірнеше нөкерін ертіп оңтүстік өңірлерге жасаған жұмыс сапарынан журналист үкімет басшысының ерекше белсенділігін байқаған сияқты.

«Мұражайларды аралайды. Ресейге барған сапарында әрiптесiнен Кейкi батыр мен Кенесарының басын сұратты. Шығыс Қазақстанға жасаған сапарында Абай мұражайына арнайы бас сұқты. Алматы қаласына барған кезiнде Ахмет Байтұрсынұлының мұражайына кiрiп, Алаш арысының кiтаптарын жарыққа шығаруға уәде еттi. Ел аралағыш Мәсiмов ендi әулие жағалауға көшкен сияқты.

Кәрiм Мәсiмов осы аптада Оңтүстiк Қазақстан облысына ресми iссапармен келдi. Үкiмет жетекшiсi Шымкентте бiраз аялдап, бұдан кейiн Отырар ауданындағы Арыстанбаб кесенесiне тартты. Одан әрi Түркiстандағы Қожа Ахмет Йассауи кесенесiне бас сұқты. Журналистердi ғимараттың бiр бөлмесiне қамап қо­йып, өзi қасындағы атқамiнер­лерiмен аруақтарға құран бағыштап шықты (премьер осы ресми емес шараны елден жасырмай-ақ iстесе не болар едi дейсiң). Ке­се­не­нiң қазандық бөлмесiнде тұ­рып жергiлiктi ақсақалдармен тiлдес­тi. Қариялар Үкiмет жетек­шiсiне табиғи газ, тұрғын үйге қатысты бiраз сауалдарды қой­ды. Бiр-екi ауыз қазақша сөз сөйлеген К.Мә­сiмовтiң одан арғы жауабын өзiмен ерiп келген министрлер жалғап кеттi. Ақсақалдардың ақ тiлегiн естiп, батасын алған Кә­рiм Мәсiмов осыдан кейiн Халықаралық қазақ-түрiк университе­тiнде зиялы қауым өкiлдерiмен кездесуге кеттi... Мұның бәрiн неге тiзiп отырмыз?

Жалпы, К.Мәсiмовтiң осы жолғы Түркiстанға жасаған сапары өзгешелеу болды. Президенттiң сапарын елестетедi. Үкiмет басшыларының өңiрлерге жасаған сапары бұлай болмайтын. Прези­дент­тiк сценарий. Мұны бiр деңiз. Екiншiден, Мәсiмов ту­ризм­дi сылтау етiп, әулие-әмбие­лердiң басына зиярат ету үшiн келгендей көрiндi. Кейiнгi кезде­рi отставкiге кетедi деген Мәсi­мов қолдауды тылсым күш­терден сұрап жүрген сияқты. Әйтеуiр, бiр құпияның бары анық. Оны бүйтiп әулие аралауға не мәж­бүрледi деген ой оңтүс­тiктегi көпшiлiктiң көкейiндегi басты сауал болды.

Оңтүстiк Қазақстан облысына жасаған iссапарын Әулиеата жерiнде жалғастырған Мәсiмов көне Тараз қақпасына кiрер тұстағы Айша бибi кесенесiне тәу етуге барды. Қарахан баба кесенесiне де арнайы бас сұ­ғып шықты. Осыдан кейiн “Көне Тараз” мәдени-тарихи кешенiнде – ашық аспан астында облыстың зиялы қауым өкiл­дерiмен кез­дестi. Осылайша Түркiстандағы сценарий тағы да қайталанды.

Осы кездесуде археология тақырыбы ерекше талқыланды. Премьер-министр Мәдениет жә­не спорт министрлiгiне тарихи орындарды зерттеу бойынша археологиялық және ғылыми-зерттеу жұмыстарын жалғастыруды тапсырды. Сонымен қатар Қар­жы министрлiгiмен бiрiгiп, 2017–2019 жылдары “Көне Тараз” мұража­йын дамыту үшiн қаржы бөлу туралы ұсыныс дайындауды және республикалық бюджет комиссиясына ұсынуды тапсырды.

Ал Жамбыл өңiрiндегi жастармен кездесу барысында өте өзектi мәселелер көтерiлдi. Жастар iсi жөнiнде ведомствоаралық комиссия құру керек деген ұсынысты премьер жылы қабылдады.

–Мұндай комиссияны құру қажет. Оған өзiм же­текшiлiк етемiн, – деп жауап бердi.  “Көңiлдi тапқырлар клубына неге кел­мей­сiз?” деген сауалды да премьер ұсыныс ретiнде қабылдап, алдағы уақытта тап­қырлардың кешiне барып тұруға уәде еттi. “Мәә Мә­сiмов...” дегiзiп премьер орысша сөйлеу жағы басымдау кездесуде жастардың да көңiлiн табуға тырыс­ты», - дейді Ғ. Елшібай.