Қазақстан Республикасының Мемлекеттік қызмет істері және сыбайлас жемқорлыққа қарсы іс-қимыл агенттігінің төрағасы Қайрат Қожамжаров мемлекеттік қызметкерлердің киімі көпшілік мақұлдаған іскерлік стилге сәйкес болуы керектігін мәлімдеді.

Мемлекеттік қызметкер жұмысқа орамал тағып бару туралы сұрағын egov.kz сайты арқылы Агенттік төрағасына жолдаған.

«Жұмысымдағы басшылық мемлекеттік қызметте орамал түріндегі бас киімді киюге қарсы. Өзім ресми стильде киінемін. Басшылардың орамалыма қатысты наразылығы қаншалықты заңды? Егер басшылықтың талабы заңды болса, ол ҚР қай заңында көрсетілген? Мемлекеттік қызметке орамал кедергі бола ала ма?» деп сұрақ жолдады мемлекеттік қызметкер.

Оған Агенттік басшысы былай деп жауап берді: «Этникалық кодекске сай, мемлекеттік қызметкердің қызмет бабындағы сыртқы келбеті мемлекеттік аппараттың абыройын жоғарлатуы керек. Көпшілік мақұлдаған іскерлік стилге сәйкес болуы қажет. Ол ресми, салмақты және жинақы болғаны абзал. Агенттік мемлекеттік қызметкерлердің киімі турасында тарқатып жазған ұсынысын дайындаған. Одан мемлекеттік қызметкердің киімі турасында анығырақ біле аласыз. Аталмыш ұсыныста орамал түріндегі бас киім қарастырылмаған».