Мәжіліс депутаты Асхат Аймағамбетов Қазақстан мектептеріндегі қауіпсіздікті күшейту қажеттігін айтып отыр.

Депутат Тelegram-дағы парақшасындағы жазбасында бірнеше жыл бұрын құқық қорғау органдарының бастамасымен мектептердегі вахтерлердің орнына кәсіби күзет ұйымдары енгізілгенін еске салды.

Расында, жасы келген адамдар төтенше жағдайда дұрыс әрекет ете алмайды дедік. Бірақ… Не өзгерді? Ашығын айтқанда, ештеңе. "Вахтер" деген сөзді "күзетшіге" ауыстырдық, ал іс жүзінде көбінесе сол баяғы адамдар. Көп жағдайда – жасы алпыстан асқан апа-аталар. Кейде тіпті бұрынғы вахтерлерден де алшақ, мектептің ішкі өмірінен бейхабар. Неге? Себебі қаражат аз. Тендерді ең арзан баға ұсынған компания ұтады. Ал олар кімдерді жұмысқа алады? Дайындығы жоқ, жиі ауысатын, кейде бейресми түрде істейтін адамдарды, - деп жазды мәжілісмен.

Мәжіліс депутатының сөзінше, вахтерлер мұғалімдерді танымайды, мектеп режимін білмейді, оқушылармен қалай сөйлесу керек екенін де түсінбейді.

Мектеп – жай ғана ғимарат емес, бұл – балаларымыздың екінші үйі. Ал оны қорғау – жай ғана "отыр" дей салатын жұмыс емес. Күзет ұйымдарына қойылатын талаптар да тым әлсіз. Жасына, денсаулығына, кәсіби дайындығына нақты талап жоқ. Құжатта бір адам көрсетіледі, ал іс жүзінде басқа адам жұмыс істеп жүреді. Ешкім тексермейді. Көбіне бір ғана күзет постына ақша бөлінеді. Ал мектепте мың жарым, кейде екі мың бала бар. Кіріп-шығатын 2-3 есік, - деп атап өтті ол.

Асхат Аймағамбетов осы мәселеге қатысты бірқатар ұсыныс тастады:

• Ішкі істер министрлігі күзет ұйымдарына қойылатын лицензиялық талаптарды күшейтуі керек;
• ІІМ ел бойынша бірыңғай стандарт қабылдауы тиіс;
• ІІМ мектептің көлемі мен оқушы санына қарай күзет посттарының нақты нормативін бекітуі қажет;
• Сатып алу тетіктері жетілдірілуі тиіс.