Keshe Bishkekte QR Premer-Mınıstri Kárim Másimov TMD Úkimetteri Basshylary Keńesiniń kezekti otyrysyna qatysty, - dep habarlaıdy Qamshy.kz primeminister.kz – silteme jasap.

Otyrys qatysýshylary saýda-ekonomıkalyq, energetıka, densaýlyq saqtaý jáne bilim berý salalaryndaǵy ıntegrasıalyq ózara is-qımyldy damytýǵa arnalǵan máselelerdiń keń aýqymyn talqylady.

Atap aıtqanda, birjaqty formattaǵy otyrysta delegasıa basshylary TMD organdarynyń 2016 jylǵa arnalǵan biryńǵaı búdjetine ózgertýler engizý týraly máseleni qarady, dep málimdedi Atqarýshy komıtettiń tóraǵasy - TMD Atqarýshy hatshysy Sergeı Lebedev keńeıtilgen quramdaǵy otyrys barysynda. 

Kún tártibinen tys TMD Atqarýshy komıtetiniń TMD elderi Basshylary Keńesiniń Qazaqstan Respýblıkasynyń 2015 jylǵy 16 qazandaǵy usynystary týraly hattama sheshimin júzege asyrý barysy jaıly málimet tyńdaldy. 
«Osy másele aıasynda TMD qyzmetin jetildirý týraly ótkir jáne konstrýktıvti pikir almasý ótti jáne Keńeske TMD elderiniń turaqty ókiletti ókilderine, Ekonomıkalyq máseleler jónindegi komısıaǵa jáne TMD Atqarýshy komıtetine birjaqty formatta ótken otyrys barysynda aıtylǵan barlyq eskertýlerdi, paıymdaýlar men pikirlerdi eskertýdi tapsyratyn hattama sheshimi qabyldandy», - dedi S.Lebedev, sondaı-aq ol bul másele bıylǵy jyldyń 16 qyrkúıeginde Bishkekte TMD Memleket basshylary Keńesinde qaralatynyn aıtty. 

Barlyǵy Dostastyq elderiniń túrli salalardaǵy yntymaqtastyǵyn odan ári keńeıtý jáne tereńdetýge baǵyttalǵan jıyrmadan astam qujat jobasy qaraldy.

TMD ÚBK-niń kelesi otyrysy 2016 jylǵy 28 qazanda Mınskde ótedi.