El halqynyń 70 paıyzy ózin «qazaqstandyq» dep sanaıdy. Muny Ortalyq komýnıkasıalar qyzmetindegi baspasóz máslıhatynda QR Prezıdenti janyndaǵy memlekettik basqarý akademıasynyń profesory, saıası ǵylymdar doktory Jańyljan Júnisova jetkizdi, - dep habarlaıdy Qamshy.kz kursiv.kz-ke silteme jasap.
J. Júnisovanyń bul aıtyp otyrǵandary janynan shyǵarǵany emes, memlekettik deńgeıdegi baǵdarlamalarmen negizdelgen, josparly, júıeli jumystyń nátıjesi sekildi kórinedi. Atap aıtqanda, «100 naqty qadam» Ult josparyndaǵy negizgi baǵyttardyń biri Qazqaqstanda «Birińǵaı bolashaq ultyn» qurý kórinedi. Bul ult «Máńgilik el» ulttyq ıdesásyna súıengen ulttyq biregeıliktiń úlgisi bolmaq.
«Kóptegen áleýmettik zertteýlerdiń, onyń ishinde «Nur Otan» partıasy qoǵamdyq saıasat ınstıtýty júrgizgen zertteýler halyq arasynda qazaqstandyq biregeıliktiń basymdyqqa ıe ekenin kórsetedi. Saýalnamaǵa qatysýshylardyń basym bóligi ózderin Qazaqstannyń ókilimiz dep sanaıdy. «Ózińizdi birinshi kezekte kimmin dep sanaısyz?» degen suraqqa qatysýshylardyń 70 paıyzǵa jýyǵy «Qazaqstan Respýblkaıysynyń azamatymyn» dep jaýap bergen», - deıdi J. Júnisova.
Áleýmettanýshylardyń bul zertteýdi ne maqsatpen, qandaı qajettilikti oılap júrgizgeni belgisiz, biraq, «nátıjesine» ózderiniń kóńilderi tolatyn sıaqty. Azamattyq prınsıpine negizdelgen qazaqstandyq biregeıliktiń qalyptasýy qajetti deńgeıge jetti dep sanaıdy.
«Ol zamanǵa saı kásibı jáne avtonomdy basqarý apparaty bar, zań ústemdik etetin jáne menshik quqyǵy qorǵalatyn, orta tap tez qalyptasatyn, turaqtylyq pen qoǵamdyq kelisim saqtalatyn memlekette tabıǵı jolmen ornyǵady», - dep sanaıdy Akademıa profesory.
Osylaısha, «Siz birinshi kezekte ózińizdi kimmin dep sanaısyz?» degen suraq qoıyp, oǵan «Qazaqstan Respýblıkasynyń azamaty» degen jaýap nusqasyn usyný syndy qıturqylyqpen ótkizilgen zertteýler biraz jul buryn ultshyldardyń tabandylyǵy arqasynda áreń basylǵan «qazaqstandyq ult» jobasynyń qaıta tirilgenin dáleldep otyr. Qaıta 70 paıyz degeni az sıaqty. Álgindeı qıturqylyqtarmen 99 paıyz kórsetkishtiń sýretin salyp jatsa da tań qalatyn jaıymyz joq.
Jomart Abdollauly
