«Terorızmmen kúresti tıimdi etý úshin burynǵy zańnamalardy qaıta qaraý kerekpiz» degen Elbasy sózinen soń zańdarǵa ózgeris engizý, buryn qoldanystan shyqqan jaza túrlerin «qaıta tiriltý» jaıy sóz etile bastady, - dep habarlaıdy Qamshy.kz 31-arnaǵa silteme jasap.
Senatorlar ólim jazasyna engizilgen moratorııdi alyp tastap, terrorısterdi túgel atýdy surap otyr. Lańkestermen tek osylaı kúresý kerek degen depýtattar tipti shetelde oqyǵandardy ımam etpeý kerek deıdi.
Biraq, senatorlar qyzdy-qyzdymen Bas múftıdiń ózi Mysyr elinde bilim alǵanyn umytyp ketken sıaqty. «Saqaly uzyn men balaǵy qysqanyń» barlyǵy ekstremıst emes. Aqtóbede terakt bolmaı turyp osylaı degen senator Serik Aqylbaı búgin de aıtqanymnan qaıtpaımyn dep otyr. Adam alasy ishinde degen depýtat teraktiden keıin jurtty «saqal-murtyn» qyrýǵa májbúrlemeı, qolǵa túsken terrorısterdi túgel tergeý kerek deıdi. Tipti qandyqol qylmyskerler atylýy tıis.
SERİK AQYLBAI, QR Parlamenti senatynyń depýtaty:
- Olardy atý jazasyna deıin barý kerek. Bizde qazir moratorıı. Ony alý kerek. Terorızm jasaǵan, kúnásiz adamdardy óltirgenderge bir-aq jaza bolý kerek - atý jazasy.
Kezinde sýdıa bolyp, tipti, eki qylmyskerge ólim jazasyn kesken senator salafızm ispetti aǵymdardy tejeý tásilin de taýypty. Sheteldiń dinı oqý oryndarynda bilim alyp kelgenderdi ımam nemese dinı uıym basshylyǵyna otyrǵyzbaý kerek degen Serik Aqylbaı, basqa júzdegen ımamdardy aıtpaǵanda, Dinı basqarma basshysy Ál-Azhar ýnıversıtetinde oqyǵanynan habarsyz bolýy kerek.
SERİK AQYLBAI, QR Parlamenti senatynyń depýtaty:
- Bizdiń dinbasylarymyz, ımamdarymyz ózimizdiń memlekettik dinı oqý oryndaryn bitirgender bolý kerek. Syrtta bitirgender, basqa elde, aǵymdar bitirgender ımam bolmaýy kerek. Ony mindetti túrde dinı basqarma qaraýy kerek.
Teris aǵymdardyń qanat jaıýyn shetelden kórgen joǵarǵy palata ókilderi ózge elde soǵysqan qazaqstandyq sodyrlardy elge qaıta kirgizýge de qarsy eken.
MANAP KÓBENOV, QR Parlamenti senatynyń depýtaty:
- Sırıa ispetti soǵystyń oty tutanyp jatqan jerlerde qarý ustap kelgen qazaqstandyqtardy elge qaıta qabyldap qajeti joq edi. Sebebi olar ózderimen birge, sol jerde sińirgen kózqarastary men ıdeıalaryn erte keledi. Azamattyqtan aıyrý da qaralýy kerek.
Dinı uıymdardyń meshitten basqa jerde basqosýyna da senatorlar qarsy. Qaýipsizdikke jaýapty organdardyń ishki barlaýy álsiz dep synaǵan olar qarý satý jaǵyn da qolǵa almaq. Esterińizde bolar, prezıdent eki aı ishinde terorızm, qarý satý, kóshi-qon zańdaryna usynys engizińder dep úkimetke tapsyrma bergen. Senatorlar da bastamaǵa ózimizshe ún qosamyz dep otyr.
