QR memlekettik syılyǵynyń laýreaty Sábıt Dosanov QazUÝ stýdentterimen kezdesti, - dep habarlaıdy Qamshy.kz.
Buryn M.Sholohov atyndaǵy halyqaralyq syılyqtyń laýreaty, Sergeı Esenın atyndaǵy «Zolotaıa osen» dıplomy men ordenimen, Vasılıı Shýkshın medalimen marapattalǵan, Qazaqstannyń eńbek sińirgen qaıratkeri, QR memlekettik syılyǵynyń laýreaty, qazaqtyń mańdaıyna bitken birtýar uly – Sábıt Dosanov ózi túlep ushqan qara shańyraǵy – ál-Farabı atyndaǵy Qazaq ulttyq ýnıversıtetinde taǵy bir zor marapatqa ıe boldy. «Shynar» jýrnalynyń bas redaktory, Mahmud Qashqarı atyndaǵy qor prezıdenti, Ázirbaıjannyń kórnekti aqyny Elhan Zal Karahan Sábıt Dosanovqa «Aq Arýana» shyǵarmasy úshin Mahmud Qashqarı atyndaǵy halyqaralyq syılyqty tabystaı otyryp, túrki álemindegi qazaq halqynyń ornyn, eki el arasyndaǵy týystyqty «Ázirbaıjan men Qazaqstan» óleńi arqyly atap ótti. Sonymen qatar, Elhan Zal Karahan «Shynar» jýrnalynyń basty betin Sábıt Dosanovqa arnap, onyń «Aq Arýana» kitabyn ázirbaıjan tiline aýdarǵan.
Mahmud Qashqarı atyndaǵy qor jumysynyń basty maqsaty – túrik halyqtarynyń mádenıeti men ádebıetin búkil álemge taratý, jer betindegi barlyq halyqtar arasyndaǵy qarym-qatynasty nyǵaıtý. Mahmud Qashqarı atyndaǵy syılyq osy maqsatqa jetýge óz shyǵarmalary men eńbekteri arqyly qol ushyn berip júrgen azamattarǵa, ádebıet, ǵylym men óner salasynda eleýli eńbek etip júrgen jandarǵa beriledi. Mundaı bedeldi syılyqpen budan buryn Aqylbek Shaıahmet, Oljas Súleımenov syndy azamattar marapattalǵan.
Sóz basynda ál-Farabı atyndaǵy QazUÝ rektory, akademık Ǵalymqaıyr Mutanuly: «Búgingi kezdesýdiń qazaq ádebıetiniń kórnekti ókili, belgili jazýshy, dramatýrg Sábıt Dosanovpen bolýy kezdeısoq emes. Ol – bizdiń ýnıversıtettiń 1964 jylǵy túlegi. Sodan beri ol - ózi tańdaǵan sóz ónerinde shyǵarmashylyqtyń shyńyn baǵyndyryp, ýnıversıtetimizdiń atyn tek jaqsy jaǵynan shyǵaryp júrgen qazaq halqynyń daryndy tulǵasy» - dedi.
Jazýshy, dramatýrg Sábıt Dosanovpen kezdesýge, onyń qýanyshymen ortaqtasýǵa tanymal aqyn-jazýshylar: Myńbaı Rashev, Dýlat Isabekov, Ǵalym Jaılybaı, Almaty qalasy ákimdiginiń ishki jastar saıasat basqarmasynyń basshysy Nurbolat Syzdyqov, Reseı qazaqtarynyń atynan Dámeli Tasmaǵanbetova, kúıshi-kampozıtor Shámil Ábiltaev keldi.
Kezdesý barysynda Dámeli Tasmaǵanbetova jazýshyny Reseıdegi qazaqtar atynan jyly lebizin bildirip quttyqtasa, Dýlat Isabekov onyń qıly taǵdyrynan syr shertti. Al, kúıshi-kompozıtor Shámil Ábiltaev «Sábeń sal» atty Tóreǵalı Táshenovtiń óleńine jazylǵan kúıimen keshtiń sánin keltirdi. Sońǵy quttyqtaý sózdi fılologıa jáne álem tilderi fakúltetiniń dekany Ómirhan Ábdımanuly aıtty.
Ál-Farabı atyndaǵy Qazaq Ulttyq ýnıversıtetiniń rektory Ǵalymqaıyr Mutanuly kezdesý sońynda Sábıt Dosanov myrzaǵa ýnıversıtet damýyna aıryqsha úles qosqany úshin ál-Farabı atyndaǵy altyn medalin tabys etti.
