Тәуелсіздігіміздің 30 жылдығы қарсаңында, Қазақстан Республикасының Сыбайлас жемқорлыққа қарсы іс-қимыл Агенттігінің Шымкент қаласы бойынша департаменті Саз колледжімен бірлесе «Адал – жас ұрпақ» атты қалалық патриоттық әндер, эссе, әңгіме және мәнерлеп оқу байқауын ұйымдастырды.

Басты мақсат - жастар арасында сыбайлас жемқорлыққа қарсы мәдениетті ілгерілету, әдебиет пен шығармашылық арқылы парасаттылық идеологиясын дәріптеу болып табылады.

Байқауға жоғары және орта арнаулы оқу орындары мен мектептерден 70-ке жуық студенттер мен оқушылар қатысты.

Қазылар алқасы ретінде Департамент өкілдері мен мәдениет саласының үздіктері, филолог мамандар тартылды.

Ұйымдастырушылардың айтуынша осындай іс-шаралар жастарда сыбайлас жемқорлыққа қарсы мінез-құлық дағдыларын қалыптастырады.

Шара барысында қатысушылар өнерін ортаға салып,әсерлі әңгіме, қара сөз оқып, отанды сүюге, еліміздің патриоты болуға замандастарын үндеді.

Ойының ұшқырылығы және жұмысының мазмұндылығымен «Сыбайлас жемқорлыққа қарсы тақырыптағы үздік эссе, әңгіме» номинациясы бойынша ІІІ-орынды М.Әуезов атындағы ОҚУ студенті А.Самидин, ІІ-орынды индустриалды-техникалық колледжінен Д.Ахатбек, І-орынды қалалық «Адал ұрпақ» ассоциациясынан А.Жуасбек иеленді.

«Мәнерлеп оқу» номинациясы бойынша ІІІ-орынды Мирас университетінің студенті Р.Мамыр, ІІ-орынды индустриалды-техникалық колледжінен А.Рахматулла, І-орынды жол-көлік колледжінен С.Махамбет-Пахир жеңіп алды.

«Патриоттық әндер» номинациясы бойынша ІІІ-орынды Тамақтандыру индустриясы және сервис колледжінің студенті М.Келдібай, ІІ-орынды М. Әуезов атындағы ОҚУ студенті С.Жақып, І-орынды Шымкент саз колледжінің студенті П.Ким иеленді.

«Жеңіске жеткеніме өте қуаныштымын. Ұйымдастырушылар мен ұстаздарыма, қолдап келген достарыма алғысымды білдіремін» - дейді Павел Ким. Шымкент саз колледжінің студенті байқаудың барлық қатысушылары талантты, өз елінің нағыз патриот жастары екендігін жасырмады. Сондай-ақ, ол парасыз, парасатты, саналы қоғамда өмір сүруді қалайтындығын және өзі де бұл бағытта белсенділік танытатындығын жеткізді.

Жол-көлік колледжінің студенті Сәкен Махамбет-Пахир аталған байқаудан үлкен тәжірбие алғандығын айтады. «Байқау талаптары бойынша көптеген ақпаратпен таныстым, жалпы қоғамдағы адалдық принциптері, жемқорлыққа төзбеушілік, адами қасиеттерді жоғалтпау үшін жастарға үлкен жауапкершіліктің түскенін ұғындым» - деді ол.

Барлық жеңімпаздар арнайы алғыс хаттармен және сыйлықтармен марапатталды.