2012 jylǵy Olımpıada chempıony, qazaqstandyq aýyr atlet Zúlfıa Chınshanlonyń dopıng-synamasy oń nátıjesin berdi, - dep jazady QazAqparat qytaılyq China Post gazetine silteme jasap.

22 jastaǵy Chınshanlo Londondaǵy Olımpıada oıyndarynda jeńip alǵan altyn medaldan aıyrylýy múmkin. Barlyǵy «B» synamasyn ashqan soń belgili bolady.

Londondaǵy Oıyndarǵa qatysyp, altyn júldelerdi jeńip alǵan bes aýyr atlettiń dopıng-synamalary oń nátıje kórsetkeni habarlanyp otyr, dep jazady TASS.

Buǵan deıin Halyqaralyq Olımpıada komıteti (HOK) 2012 jylǵy Oıyndardyń 23 sportshysynyń «A» dopıng-synamalarynyń qaıta taldaýy oń nátıje bergenin habarlady. Bul atletter alty elden kelip, sporttyń bes túrinen qatysty. HOK synamalardy qaıta tekserýdi sheship, Brazılıadaǵy Olımpıada oıyndarynda shyǵýy tıis sportshylarǵa basa kóńil bóldi.