Aqmolalyq kásipkerler Jer komısıasynda saıasatker Muhtar Taıjan kótergen agrobank qurý týraly bastamany qoldaıdy, - dep habarlaıdy Qamshy.kz 24.kz – ke silteme jasap.
Jer reformasy jónindegi komısıanyń Kókshetaýda ótken otyrysynda aqmolalyq kásipkerler osyndaı usynys jasady. Bıznesmenderdiń bul pikiri Májilis depýtaty Vladıslav Kosarev tarapynan qoldaý tapty.
Vladıslav Kosarev, QR Parlamenti Májilisiniń depýtaty:
- Agrobank bárimiz paıdalana alatyn qarjy ortalyǵyna aınalady. Astyq saýdasynan túsken qarajat osynda jınalýy tıis. Bul bank aýyl sharýashylyǵyn damytýǵa serpin bermek.
Tórt saǵatqa sozylǵan jıynda aqmolalyqtar jerge qatysty san túrli usynystary men pikirlerin aıtty. Máselen, jer paıdalanýdy baqylaý jumystaryn kúsheıtý qajet degen oılar ortaǵa tastaldy.
Al basqosýdy qorytyndylaǵan Baqytjan Saǵyntaev «daýly máseleni ákimder emes, qoǵamdyq keńester sheshýi tıis» dep túıindedi.
Baqytjan Saǵyntaev, QR Premer-Mınıstriniń birinshi orynbasary:
- Jalǵyz jerdi satý, jalǵa berý másele ǵana emes, osynyń tóńireginde tolyp jatqan másele bar. Úlken bir másele – sheneýnikterdiń is-áreketteri. Senim bolýy kerek sheneýnikke. Osy máseleni sheshý úshin senim bolýy kerek. Ol senimdi qalaı sheshemiz? Máselen, aýksıon arqyly qarap otyrsańyz, ákimniń ózi sheship ketedi. Búgin sizder oǵan senbeı otyrǵan kezde, erteń anadaı jaǵdaı bolǵanda, senim bola ma? Suraq. Sol sebepten bul jerde másele bir ǵana ákimniń qolynda emes, ol halyqpen keńesip otyryp sheshýi kerek.
