Almaty oblysy Qarasaı aýdany Jańaturmys aýyldyq mektebiniń muǵalimi Aıman Saǵıdýllaeva mektep basshylyǵy tarapynan negizsiz qýǵyn kórdim dep otyr. Bul týraly Qamshy.kz habarlaıdy.

«2 sáýir kúni mektepke kelsem, muǵalimder bólmesin mekteptiń 3-qabatynda korıdorda jan-jaǵy temir tormen qorshalǵan bólek oryn bar edi, sol orynǵa kóshiripti. Buryn ol jerde mýzeı bolatyn. Muǵalimder sabaqqa daıyndalý úshin, jeke zattaryn, kıimderin qoıý úshin amal joq sonda kóshtik. Muny mektep basshylyǵy mektepte bir aýysymmen oqýǵa kóshýge baılanysty oqý bólmeleriniń jetpeýimen túsindirdi. Sodan únsiz jańaǵy temir torǵa baryp kirdik. Biraq, oqýshylar bylaı-bylaı ótkende yńǵaısyzdanady ekensiń. Sóıtip otyrǵanda oqýshylardyń ózara «Maımyldar sıaqty eken» dep ketip bara jatqanyn da qulaǵymyz estidi. Áriptesterim de janymda boldy sol sátte. Bir muǵalimdi janyma ertip, mektep dırektoryna bardym. Jaǵdaıdy aıttym», - deıdi Aıman Saǵıdýllaeva.

Kóp uzamaı basshylyq muǵalimderdi temir tordan shyǵaryp, basqa bólmege kóshirgen. Alaıda, áriptesteriniń qamyn jegen muǵalim basshylyqqa taǵy jaqpaı qaldym dep otyr. Aıtýynsha, búgin onyń qolyna birneshe muǵalimder qol qoıǵan, «pedagogıkalyq etıkaǵa jat qylyq kórsetti» degen akt men mektep basshysynyń eskertý haty tapsyrylǵan. Hatta oǵan endigi ýaqytta mektep basshylyǵynan «adamı turǵyda túsinýshilikpen qaraýdy» kútpeý eskertilgen eken.

A. Saǵıdýllaeva buǵan deıin mektep ishindegi keri qaǵıdalarǵa, irili-usaqty zań buzýshylyqqa kóz jumyp qaramaǵanym, áriptesterimniń quqyǵyn qorǵaǵanym úshin basshylyq tarapynan qýǵyn kórip kelgenin aıtady.

«Aldynda 19 mamyrda aqsaqaldar keńesi arqyly aqyl aıtqyzbaq bolyp, sol jıyn nátıjesinde maǵan eskertý jarıalady. Odan kóp uzamaı emtıhan nátıjeleri boıynsha sógis berdi. Endi bir ret «qatań sógis» jarıalap, bar oılary – meni jumystan qýý» dep otyr ustaz.