Batys Qazaqstan oblysynda dástúrli emes dinı aǵymnyń 17 ókili ustaldy. Olardan túrli taıaqtar men armatýra qıyndylary tárkilendi, - dep habarlaıdy Qamshy.kz oblystyq lańkestikpen kúres jedel shtabyna silteme jasap.

«BQO UQK departamenti oblystyq İİD-men birge dástúrli emes dinı aǵymdardyń birine qatysty málimetti tekserdi. Olar 1994 jyly týǵan atyraýlyq bir baýyrlaryna belgisiz bireýler tartyp alǵan avtokóligin qaıtarýǵa kómektesýdi oılastyrǵan» delingen habarlamada.

Quqyqqorǵaýshylar kólikti zańsyz tartyp alý oqıǵasynyń shynymen bolǵanyn anyqtaǵan. Eki tarap arasyndaǵy qaqtyǵysty boldyrmaý maqsatynda 17 adam ustalǵan.

«Bolýy múmkin jaǵymsyz jaǵdaıdyń aldyn alý maqsatynda atalǵan azamattar anyqtalyp (17 adam), 10 maýsym kúni saǵat 02.00-de «Báıterek» bazarynyń janynda ustaldy. Ustalǵandar sol jerde jınalyp, odan ári Asan aýlyna baryp, onda kólikti tartyp alǵandarmen qaqtyǵys jasamaq bolǵan», - delingen jedel shtab habarlamasynda.

Ustalǵandardyń kóliginen polısıa 5 beısbol taıaǵyn, bir armatýra tapqan.

«Ustalǵan azamattar Oral qalasynyń İİB-ge jetkizildi. Aldyn ala tergeý sharalary júrýde», - deıdi shtabtaǵylar.