Keshe mamyr aıynda jer reformasyna narazylyq tanytyp, artynsha qýǵyn kórgen belsendiler QR Bas prokýrorynyń aıryqsha tapsyrmalar boıynsha aǵa kómekshisi Habylsaıat Ábishevpen kezdesti, - dep habarlaıdy Qamshy.kz uralskweek.kz – ke silteme jasap.

Oral qalasyna belsendilermen júzdesý úshin H. Ábishev pen Bas prokýratýra basqarmasynyń aǵa prokýrory Erjan Turmaǵambetov Bas prokýror Jaqyp Asanovtyń tapsyrmasy boıynsha arnaıy barypty.

Bas prokýratýra ókilderimen kezdesýde zańger Abzal Quspan, jer reformasyna narazylyq tanytyp, qýǵyndalǵan belsendiler Luqpan Ahmedárov, Isataı Ótepov, Baýyrjan Álipqalıev, Asqar Shaıǵumarov, bloger Nurlan Sádir, «Ýralskaıa nedelá» basylymynyń bas redaktory Tamara Eslámova qalyptasyp otyrǵan jaǵdaıǵa qatysty oılaryn ashyq jetkizdi.

Belsendiler ózderiniń mundaı deńgeıde kezdesýdi kútpegenderin aıtady.  

«Biz sizderdi tyńdaýǵa keldik. Ne nársege narazysyzdar, qandaı problemalar alańdatady? Sony bilgimiz keledi», - degen H. Ábishev azamattardyń oılaryn ortaǵa salýyn suraǵan.

Eki saǵatqa sozylǵan kezdesýde belsendiler Bas prokýrordyń aǵa kómekshisi men basqarma aǵa prokýroryna óńirde ǵana emes, jalpy elde qalyptasyp otyrǵan jaǵdaılar, jer reformasynyń qaýipti saldary, belsendilerdi qýdalaý, eldiń áleýmettik ahýaly, ákimdikter janyndaǵy qoǵamdyq keńesterdi jasaqtaýdaǵy kemshilikter, túrli tarıfterdiń ósýi syndy kóptegen ózekti máselelerdi jaıyp salǵan.

Belsendilerdiń barlyǵy bir aýyzdan Bas prokýratýra ókilinen negizsiz qýdalaýdy toqtatýdy surady.

«Ózgeris bolady dep oılaımyn. Biz HHİ ǵasyrda ómir súrip jatyrmyz. Bizge qarsylyq tanytý emes, dıalog qurý kerek. Men ózim de demokratpyn, adamdar ózin qor sezinbeýi kerek, qaıta ózine kórsetiletin qurmetti sezinýi tıis. Prezıdent te osyny jıi aıtady», - dedi H. Ábishev el azamattarynyń ótinish-tilegin tyńdaǵan soń.

Oralǵa deıin Bas prokýratýra ókilderi Atyraýda da bolyp, óńir belsendilerimen júzdesken.