Sońǵy ýaqytta «Májilis jerdi jekege satýǵa, shetelge arendaǵa berýge tyıym salatyn zań jobasyn qaraýyna aldy» degen habar aqparat alańyn sharlap ketti. Búgin «Májilis shetelge jerdi jalǵa berýdi, jekemenshikke satýdy toqtatatyn zańdy maquldady» dep, birneshe aqparat quraly (qazaq, orys tilderinde) elden súıinshi surap jatyr. Jaqsy habardy qyzǵanǵandaı boldy der keı áriptester. Alaıda, aqıqaty qymbat. Eshqandaı da shetelge jer berýdi toqtatatyn zań maquldanbady. Bul - 6 mamyr kúni Prezıdent jarıalaǵan moratorııdi quqyqtyq turǵyda qýattaýǵa arnalǵan zań jobasy.
Prezıdent normalaryn toqtata turý týraly moratorıı jarıalaǵan qujat basqa emes – zań. Iaǵnı, Úkimet basshysynyń ne oblys ákiminiń áldebir qaýlysy emes, zań shyǵarýshy organ, parlamenttiń qos palatasy birigip maquldaǵan zań. Zań bolǵanda da kodeks. Jer kodeksi. Demek, prezıdent qoldanysqa enýine ýaqytsha shekteý qoıǵan ondaǵy keı talaptar sol parlamenttiń qaraýymen taǵy bir qýattalýy, moratorıı engizý týraly prezıdent Jarlyǵy zańmen rásimdelýi kerek bolǵan. Alaıda, bul, jer shetelge berilmeıtin boldy degen talap birjola qabyldandy degendi bildirmeıdi. Prezıdenttiki moratorıı týraly Jarlyq bolsa, bul - moratorıı týraly Zań. Boldy.
Bir sózben aıtqanda, Májilis maquldady degen zań da «Jer kodeksiniń» daýly normalaryn tek jyl aıaǵyna deıin toqtata turady. Muny zań qabyldaǵan depýtattar da, osy aýylsharýashylyǵy men jer qatynastaryna jaýapty mınıstr Asqar Myrzahmetov te aıtyp otyr.
«Barlyǵymyz biletindeı, jer qatynastary salasynda shyqqan máselelerge baılanysty Prezıdenttiń 2016 jyldyń 6 mamyryndaǵy jarlyǵy boıynsha jer kodeksiniń keıbir normalaryna moratorıı engizilgen bolatyn. Naqtylap aıtqanda, bul QR 2015 jyldyń 2 qarashasyndaǵy «QR Jer kodeksine ózgerister men tolyqtyrýlar engizý týraly» zańynyń normalaryn júzege asyrý; Ekinshi másele, sheteldikterge usyný, azamattyǵy joqtarǵa, sheteldik zańdy tulǵalarǵa, sonymen qatar jarǵylyq kapıtalynda 50 paıyzdan asa úlesi sheteldikterdiń menshigindegi zańdy tulǵalarǵa, aýyl sharýashylyq jer ýchaskelerin jalǵa alý shartymen usynýǵa. Úshinshisi, memlekettiń menshigindegi aýylsharýashylyǵyndaǵy jer ýchaskelerin jeke menshik quqyǵyna berý týraly norma», - deıdi vıse-premer - aýyl sharýashylyǵynyń mınıstri Asqar Myrzahmetov.
Olaı bolsa, quqyqtyq quıtyrqylyqqa ózimizdiń boı aldyrǵanymyz qalaı? Mıllıondaǵan qazaqtyń qabyrǵasyn qaıystyryp otyrǵan kúrdeli máselede jeńiltektik tanytýǵa, asta-tók aqparatqa at-ústi qaraýǵa bola ma? Bılik organdarynyń búrokratıalyq prosedýralaryna bola Alashtan súıinshi suraıtyndaı ne kórindi? «Jer satylmaıtyn boldy. shetelge arendaǵa tyıym salyndy» dep kimdi aldaımyz?
