Búgin aqyn, jazýshy, kompozıtor, ánshi Ermurat Zeıiphanulynyń dúnıege kelgen kúni. Qazaq rýhynyń, Otanǵa degen sheksiz mahabbat pen ystyq saǵynyshtan týǵan «Kók týdyń jelbiregeni» ániniń avtory Ermurat Zeıiphanuly 2011 jyly 21 maýsymda, 46 jasqa qaraǵan shaǵynda dúnıeden ótti.
Ol 1966 jyly 15 mamyrda Qytaı Halyq respýblıkasyndaǵy Shyńjań ólkesi, İle aımaǵy, Kúnes aýdanynda dúnıege kelgen. Orta mektepti, óner ınstıtýtyn sonda támamdap, 1991 jyly qazan aıynda Qazaqstanǵa oralǵan.
Alǵashqy prozalyq shyǵarmasy 1999 jyly «Sybyzǵy saryny» degen atpen jaryq kórse, poezıa kitaby 2002 jyly «Ózińe arnadym» degen atpen jaryq kórgen. «Úsh býryl», «Bu dúnıe» sıaqty kitaptary oqyrman qaýymnan laıyqty baǵasyn alǵan. Respýblıkalyq gazet-jýrnaldarda shyǵarmalary úzbeı jarıalanyp turdy. «Juldyz» jýrnaly uıymdastyrǵan 2001 jyly Artyǵalı Ybyraevqa arnalǵan músháıranyń júldegeri.
Qazaqstan Respýblıkasy Qorǵanys mınıstrliginiń orkestrinde qyzmet etken, ol elimizdiń kóptegen aımaqtarynda, shet elderde án salyp, qazaq óneriniń mereıin ústem etken edi.
Ómirde sypaıy, ustamdy, sabyrly da syrbaz aqyn azamattyń aıaýly beınesi el jadynda uzaq saqtalady.
Qurmetti oqyrman! Nazarlaryńyzǵa belgili rejıser Ásemǵazy Qapanuly ázirlegen derekti fılmdi usynamyz.
