«Qazgıdromet» ortalyǵynyń habaralaýynsha, aldaǵy úsh kúnde Astanada jańbyr jaýyp, naızaǵaı oınaıdy.

19 shilde kúni kún qubylmaly bolady dep boljanýda, jańbyr jaýyp, naızaǵaı oınaıdy, burshaq jaýýy yqtımal. Soltústikten jel soǵady, soltústik-batystan soǵatyn jeldiń jyldamdyǵy 9-14 m/s quraıdy, kúndiz jeldiń ekpini 15-20 m/s-qa jetedi. Túnde aýa temperatýrasy +11+13 gradýsty quramaq, kúndiz aýa baǵamy +22+24 gradýs jylylyqty kórsetedi.  

Astanada 20 jáne 21 shildede aýa raıy týra osy qarqynda bolady dep kútilýde.

Onymen birge qalanyń komýnaldy qyzmeti qatty jaýǵan jańbyrdyń saldyryn jedel túrde joıýda.

Máselen, «Almaty» aýdany boıynsha «Astana Tazalyq» JSHS kúndizgi aýysymda 37 As tehnıka kóligi men 2 motopompa  jumysqa tartylǵan. Atap aıtqanda arnaıy tehnıka jeke sektorlarǵa jumyldyrylǵan.

«Saryarqa» aýdanynyń aýmaǵynda jańbyrdyń sýlaryn soryp alý úshin 16 As tehnıkasy jumyldyrylǵan. Jumys eki aýysymda júrgizilýde. Oǵan qosa, Óndiris turǵyn kesheninde kún saıyn topyraq sýlaryn soryp alý jumysy júrgiziledi.

«Esil» aýdany boıynsha jańbyrdyń saldaryn joıýǵa 38 As tehnıka kóligi jumyldyrylǵan.

Sýdy soryp alý jáne sý deńgeıiniń kóterilýin aldyn alýǵa baǵyttalǵan jumys úzdiksiz atqarylýda. Qala bıligi turǵyndar men qonaqtarǵa tótenshe jaǵdaı oryn alǵan jaǵdaıda «109» qyzmetine habarlasýǵa keńes beredi.