Bıylǵy jyly oqý orny motoatqysh, desanttyq-shabýyldaý áskerleri jáne áskerı barlaý mamandyqtary boıynsha oqytý úshin kadetterdi oqýǵa qabyldaýǵa ázir dep habarlaıdy Qamshy.kz aqparat agenttigi Qazaqstan Respýblıkasy Qorǵanys mınıstrligine silteme jasaı otyryp.
Jyl saıyn ortasha eseppen alǵanda 1 500 jas qazaqstandyq oqýǵa qujattaryn tapsyrady. Kadet korpýsyna 17 jastan kishi emes jáne 25 jastan aspaǵan azamattar qabyldanady. Kadet korpýsyna oqýǵa túsýge nıet bildirgender turǵylyqty jeri boıynsha jergilikti áskerı basqarý organdarynda medısınalyq kýálandyrýdan ótedi. Ári qaraıǵy kezeńder aldyn ala medısınalyq kýálandyrý, aldyn ala kásiptik-psıhologıalyq irikteý, dene daıyndyǵyn tekserý, túpkilikti medısınalyq kýálandyrý jáne túbegeıli kásibı-psıhologıalyq irikteý. Sodan keıin konkýrstyq irikteý jáne kandıdattardyń oqýǵa túsýi tikeleı Kadet korpýsynda júzege asyrylady. Qabyldaýdyń árbir kezeńinen ótýge bir-aq ret ruqsat etiledi. Aldyńǵy kezeńnen ótpegen oqýǵa túsýshi kelesi kezeńge jiberilmeıdi. Barlyq kezeńder shildeniń 20-y men aǵymdaǵy jylǵy tamyzdyń ortasyna deıin ótkiziledi. Qabyldaý kezeńinde oqýǵa túsýshiler Kadet korpýsynyń aýmaǵynda ornalasady jáne tamaqpen qamtamasyz etiledi.
Jalpy oqý merzimi 1 jyl 10 aıdy quraıtynyn aıta ketken jón. Bul ýaqyt ishinde kadetter teorıa jáne is júzinde áskerı ǵylymnyń qyr-syryn meńgerip, tehnıkalyq jáne kásibı bilim alady. Bul kolej deńgeıine sáıkes keledi jáne olarǵa «áskerı basqarýdyń kishi mamany (menedjer), «V», «S» sanatyndaǵy júrgizýshi jáne 3-synypty JÁJM mehanık-júrgizýshisi biliktiligi beriledi. Oqytý aıaqtalǵannan keıin árqaısysymen 10 kúntizbelik jylǵa serjanttar quramy laýazymynda áskerı qyzmet ótkerý týraly kelisimshart jasalady. Odan keıin kadetter áskerı bólimderge bólimshe komandırleri laýazymdaryna taratylady. Alǵan bilimderi jas serjanttardyń bólimshelerdi basqarýdaǵy senimdiligin arttyrady. Bul áskerı bólimderdegi ári qaraıǵy qyzmetterine qolaıly yqpal etedi jáne bólimshe komandırinen bastap Qarýly Kúshterdiń bas serjantyna deıin qyzmettik mansap boıynsha kóterilýge múmkindik beredi. Sondaı-aq memleket tarapynan barlyq áskerı qyzmetshilerge áleýmettik qoldaý qarastyrylǵan.
Búginde Kadet korpýsy kásibı serjanttardy daıyndaýdaǵy negizgi bilim oshaǵy bolyp tabylady. Kadet korpýsynyń túlekteri Qarýly Kúshterde bolsyn, ózge de áleýetti qurylymdarda bolsyn qyzmetterin oıdaǵydaı ótkerýde. 1996 jyldan bastap Kadet korpýsy barlyǵy 2800-den asa kásipqoı serjantty daıyndap shyǵardy. Oqýǵa qabyldaý erejeleri týraly tolyqqandy aqparatty www.mod.gov.kz siltemesi arqyly QR Qorǵanys mınıstrliginiń («Bilim berý» taraýy) alýǵa bolady.
