18 tamyz kúni QR Qarýly Kúshteri Áýe qorǵanysy kúshteriniń qurylǵanyna — 19 jyl tolady. Osyǵan oraı Áýe qorǵanysy kúshteriniń arnaıy oqý-jattyǵýyna Almaty qalasynyń qorǵanys isteri jónindegi departamentiniń uıymdastyrýymen jýrnalıser qosyny qatysty dep habarlaıdy Qamshy.kz tilshisi.

Qapshaǵaı kólindegi sý betine parashútten sekirý oqý-jattyǵýyna jýrnalıser Almatydan UH-1 Iroquois / HU-1 "Huey" áskerı tikushaǵymen bardyq.

Bizdi alyp ushqan komandır maıor Aıdar Ajybekov jáne kómekshi maıor Vıtalıı Lúgaı boldy.

53975 áskerı bóliminiń QR QK parashútti daıarlyq ortalyǵynyń áskerı qyzmetshileri qatysqan oqý jattyǵý týrasynda QR QK Parashút daıarlyǵy ortalyǵynyń bastyǵy podpolkovnık Leonıd Dýdkın:

«Búgingi oqý-jattyǵýǵa 53975 áskerı bólimi jáne 32356 áskerı bólimi qatysyp jatyr. Búgingi jattyǵýdyń maqsaty Olar parashútten sý betine sekirý jáne qutqarý jeletin paıdalanyp aman qalý tapsyrmalaryn oryndaıdy. Odan bólek qutqarýshy toppen sáıkesip jumys isteıdi. Bárimizde biletindeı Qazaqstannyń jeri keń, taýly, shóldi, ormandy, dalaly, terıtorıamyz bar. Sondyqtan túrli jaǵdaıda parashútpen túsip, qajetti tapsyrmalardy oryndaý Parashút daıarlyǵynan ótkenderdiń basty mindeti. Bul oqý-jattyǵýdy áskerılerdi soǵan tárbıeleıdi. Sý betine parashútten sekirgenderdiń este saqtaýǵa tıisti eń basty isi sýǵa qonbastan buryn parashútten qutylý, olaı etpegen jaǵdaıda sońy qaıǵyly aıaqtalýy múmkin. Búgin 4m/s jyldamdyqqa deıingi parashútten sekirý júrip jatyr», - dep atap ótti.

Al, 53975 áskerı bóliminiń tárbıe jáne ıdeologıalyq jumystary jónindegi bóliminiń ofıseri Darhan Qusaıynov:

«Áýe qorǵanys kúshteriniń Parashút daıarlyǵy ortalyǵynyń áskerıleri jylyna 2 nemese 4 ret sýǵa sekiredi. Búgin jaýyngerlik daıarlyq josparyna sáıkes áskerı qyzmetshiler «Insider-300 SF» parashúttik júıesimen 1200 metrge deıingi bıiktikte parashúttan sekirý ústinde. Olar sý betindegi belgilengen kvadratqa túsedi. Parashút daıarlyǵy ortalyǵynyń áskerı qyzmetshileri kúndiz-túni jerge de, sýǵa da, taýǵa da, daıyndalmaǵan ortaǵa da parashútpen sekirýge ár ýaqytta daıyn bolýy kerek. Sondyqtan jaýyngerlik daıyndyq josparyna sáıkes olar ár aıda parashútten túrli ortada sekirip turady. «Insider-300 SF» basqarylatyn jáne daıyndalmaǵan jerlerge qonýǵa arnalǵan parashút bolyp sanalady. Búgin 14 áskerı qyzmetshi parashútten sekirdi. Parashút daıarlyǵy ortalyǵynyń qyzmetshileri tikushaq kóterile alatyn 4500-5000 metr bıiktikten sekire alady», - dep atap ótti.

Ári QR Qarýly Kúshteri Áýe qorǵanysy kúshteriniń barsha qyzmetkerlerin merekesimen quttyqtady.

Oqyrmannyń qaperine salsaq, Qazaqstan Respýblıkasy Qarýly Kúshteriniń Áýe qorǵanysy kúshteri Qazaqstan Respýblıkasy Prezıdentiniń «Qazaqstan Respýblıkasynyń Qarýly Kúshterin reformalaý jónindegi budan bylaıǵy sharalar týraly» 1997 jylǵy 17 qarashadaǵy № 3761 Jarlyǵyn jáne Qazaqstan Respýblıkasy Qorǵanys mınıstriniń 1998 jylǵy 1 sáýirdegi dırektıvasyn oryndaý úshin, Qazaqstan Respýblıkasynyń qorǵanys qabiletin nyǵaıtý maqsatymen      1998 jylǵy 1 maýsymda qurylǵan.

«Qazaqstan Respýblıkasy Qarýly Kúshteri Áýe qorǵanysy kúshteriniń qurylǵan kúnin belgileý týraly» Qazaqstan Respýblıkasy Qarýly Kúshteri Áýe qorǵanysy kúshteri bas qolbasshysynyń 2008 jylǵy 17 sáýirdegi № 146 buıryǵymen Qazaqstan Respýblıkasy Qarýly Kúshteri Áýe qorǵanysy kúshteriniń qurylǵan kúni – 18 tamyz bolyp belgilendi.

Áýe qorǵanysy kúshteriniń quramyna áskerı áýe kúshteri, áýe shabýylyna qarsy qorǵanys áskerleri, áýe qozǵalysyn basqarý organdary kiredi.