Búgin Astanadaǵy Beıbitshilik jáne kelisim saraıynda Qazaqstannyń dinı birlestikteriniń ókilderi «Qazaqstan Respýblıkasynyń keıbir zańnamalyq aktilerine dinı qyzmet jáne dinı birlestikter máseleleri boıynsha ózgerister men tolyqtyrýlar engizý týraly» Qazaqstan Respýblıkasynyń zań jobasyn talqylaý boıynsha jınalys ótkizdi dep jazady Qamshy.kz aqparat agenttigi.
Atalǵan is-sharaǵa QR Din isteri jáne azamattyq qoǵam mınıstrliginiń vıse-mınıstri B.S.Aryn, Mádenıetter men dinderdiń halyqaralyq ortalyǵynyń dırektory A.P.Abýov, sondaı-aq, dinı birlestikter basshylary men ókilderi, atap aıtqanda Qazaqstan musylmandar dinı basqarmasy, Qazaqstandaǵy pravoslav shirkeýi, Qazaqstandaǵy Rım-Katolık shirkeýi, Evangeldik-lúteran shirkeýiniń ókilderi qatysty.
Talqylanyp otyrǵan Zań jobasynda shetelde dinı bilim alý, din qyzmetine memlekettik qyzmetkerlerdiń qatysýy, dinı joralǵylar men rásimder boıynsha nekeni qıǵyzýǵa qatysty jańa normalar kórsetilgen.
Zań jobasy aıasynda sondaı-aq, qoǵamdyq oryndarda adamnyń-bet beınesin tumshalaıtyn kıim túrlerin kıýge, destrýktıvti ıdeologıalyq aǵymdardy nasıhattaıtyn kıim túrlerin kıýge jáne taratýǵa shekteý qoıý kózdelgen. Sondaı-aq, atalǵan kıim túrlerin BAQ-ta jarnamalaýǵa tyıym salynady.
Budan bólek, Zań jobasy dinı birlestikterdiń qarjylyq ashyqtyǵyn qamtamasyz etý, dinı ekstremızm jáne terorızmge qarsy is-qımyl boıynsha jergilikti jáne ortalyq memlekettik organdardyń jumysynyń tıimdiligine baǵa berý júıesin engizý, dinı qatynastar sýbektileriniń qyzmetine din salasyndaǵy ýákiletti organnyń baqylaýyn kúsheıtýge baǵyttalǵan.
Shara barysynda vıse-mınıstr Berik Aryn: «atalǵan zańnamalyq qujatty qabyldaý – rýhanı-adamgershilik qundylyqtardy damytý boıynsha din salasynda memlekettik organdar men azamattyq qoǵam ınstıtýttary jumysynyń tıimdiligin arttyratyny sózsiz, sondaı-aq, qoǵamda dinı radıkaldy ıdeıalardyń taralýyna jol bermeıdi», – dep atap ótti.
Al, dinı birlestikterdiń ókilderi zań jobasyn qoldap, ózderiniń usynystaryn bildirdi. Esterińizge sala keteıik, atalǵan Zań jobasy talqylaný úshin QR Din isteri jáne azamattyq qoǵam mınıstrliginiń resmı saıtyna jáne «Elektrondy Úkimet» portalyna ornalastyrylǵan.
