Búgin QR Tuńǵysh Prezıdenti – Elbasy qory janyndaǵy Álemdik ekonomıka jáne saıasat ınstıtýtynda (ÁESI) memlekettik organdar, ulttyq kompanıalar, sarapshylar jáne ǵalymdardyń qatysýymen «Qazaqstannyń agroóndiristik kesheni – ekonomıkanyń jańa draıveri» atty dóńgelek ústel bolyp ótti dep habarlaıdy Qamshy.kz aqparat agenttigi.
Pikirtalasqa qatysýshylar Qazaqstannyń aýylsharýashylyq salasynyń damý máselelerin, naqtylap aıtqanda, Memleket basshysynyń «Qazaqstannyń úshinshi jańǵyrýy: jahandyq básekege qabilettilik» atty Joldaýynda aıtylǵan tapsyrmalardy júzege asyrý joldaryn saralady: otandyq aýylsharýashylyq ónimderiniń eksporttyq áleýetiniń damýy, aýylsharýashylyq kooperasıasyna shaǵyn jáne orta sharýashylyqtardy barynsha tartý, sý resýrstaryn tıimdi paıdalaný men AÓK saýda-logıstıkalyq ınfraqurylymyn damytý sekildi ózekti máselelerdi qarastyrmaq.
– Elimizdiń agroóndiristik kesheni ekonomıkanyń jańa draıverine aınalýy kerek. Qazaqstan aýyl sharýashylyǵynda úlken áleýetke ıe. Aýyl sharýashylyǵy – memleket ekonomıkasynyń negizgi baǵyttarynyń biri jáne bizde ekologıalyq taza ónimderdi eksporttaý arqyly álemdik azyq-túlik naryǵynda óz ornymyzdy alý úshin barlyq jaǵdaı bar, – dedi óz baıandamasynda ÁESI dırektory Erjan Saltybaev.
E.Saltybaevtyń sózinshe, sońǵy jyldary álemniń munaı, gaz jáne metal naryǵynda úlken qubylmalylyq baıqalýda. JİÓ edáýir bóligin quraıtyn Qazaqstannyń taý-ken ónidirisi salasy shıkizat resýrstaryna degen baǵanyń álemdik konúnktýrasyna baılanysty. Myqty AÓK Qazaqstan ekonomıkasynyń damýynda turaqtylyqty saqtaýǵa kómektesedi.
Sonymen qatar, dóńgelek ústel aıasynda 2017-2021 jyldarǵa arnalǵan AÓK damýynyń jańa Memlekettik baǵdarlamasyn júzege asý barysy da talqylandy.
Pikirtalasqa qatysqandar: Qaırat Aıtýǵanov – QR aýylsharýashylyǵy vıse-mınıstri; Evgenıı Gan – Qazaqstan astyq óńdeýshiler Odaǵynyń prezıdenti; Damır Egizbaev – «Ulttyq agrarlyq ǵylymı ortalyq» Basqarma tóraǵasynyń orynbasary; Ajar Qajybekova – QR Aýylsharýashylyq mınıstrligi Egin sharýashylyǵy departamentiniń dırektory; Lılıa Mýsına – «QazAgro» UBH» AQ Basqarma tóraǵasynyń keńesshisi; Arnur Muhamedjanov – QR Aýylsharýashylyq mınıstrligi strategıalar josparlaý jáne saraptama departamentiniń dırektory; Dýman Ospanov – «Aýylsharýashylyǵyn qarjylaı qoldaý qory» AQ Basqarma tóraǵasynyń orynbasary; Mıhaıl Mıronenko – QR Tuńǵysh Prezıdenti – Elbasy Kitaphanasynyń strategıalyq zertteýler men boljaý qyzmetiniń jetekshisi jáne t.b.
