QR Din isteri jáne azamattyq qoǵam mınıstri Nurlan Ermekbaev nashıd (dinı áýender) tyńdaǵan Almaty qalasynyń turǵynyna qatysty qoıylǵan suraqqa jaýap berdi dep habarlaıdy Qamshy.kz aqparat agenttigi.

«Buqaralyq aqparat quraldarynda bir azamatty dinı áýender tyńdaǵany úshin jaýapkershilikke tartyp jatyr degen jarıalanymdar paıda boldy. Biraq bul jýrnalıser men advokattar tarapynan jasalyp otyrǵan aıla-tásil. Qazirgi ýaqytta osy másele boıynsha proses júrip jatyr. Shynymen de, bir azamat tutqyndaldy. Oǵan áleýmettik, násildik, ulttyq, dinı, tektik-toptyq jáne rýlyq alaýyzdyqty qozdyrýǵa baǵyttalǵan áreketi úshin arnaıy bap negizinde aıyp taǵylyp jáne terorızmdi nasıhattaıtyn materıaldardy taratqany úshin qylmystyq is qolǵaldy», – dep túsindirdi QR Úkimetiniń baspasóz-ortalyǵynda ótken brıfıńte Nurlan Ermekbaev.

Sonymen birge, mınıstr bolyp jatqan sot talqylaýynyń jaı-japsaryn bilmeıtinin málimdep, buqaralyq aqparat quraldarynyń ókilderin mundaı aqparattarǵa synı turǵydan qaraýǵa shaqyrdy.

«Men sot úrdisi júrip jatqandyqtan, atalǵan oqıqaǵa baılanysty ázirge basqa da túsiniktemeler bere almaımyn. Biraq, jalpy aıtarym, ártúrli aqparat quraldarynda shyǵyp jatqan jarıanalymdarǵa barynsha synı turǵyda qaraý kerek. Kóbinese aqparatta shyn máninde ne bolǵany baıandalmaı, burmalanyp beriledi. Sondyqtan, ýákiletti organdardyń resmı habarlamalaryna júgingen jón», – dep óz oıyn bildirdi mınıstr Nurlan Ermekbaev.

Esterińizge sala keteıik, buryndary buqaralyq aqparat quraldarynda «Vkontakte» áleýmettik jelisinde arab tilinde «nashıd» (dinı áýender) tyńdaǵan Almaty qalasynyń turǵynyna qatysy sot otyrysy bastalǵany týraly habar taraǵan edi.