8 qyrkúıek kúni qazaq kúresinen «Álem Barysy» túıe balýandar arasyndaǵy álem chempıonaty ótedi dep habarlaıdy Qamshy.kz aqparat agenttigi. EKSPO halyqaralyq mamandandyrylǵan kórmesi aıasynda uıymdastyrylyp otyrǵan bedeldi básekege 40 eldiń balýany qatysady. Sheteldik sportshylarǵa Qazaqstannyń tórt balýany tótep beredi.
22 tamyzdan bastap qazaq kúresinen Qazaqstan Ulttyq quramasy Astanada oqý-jattyǵý jıynyn ótkizýde. Jıyn nátıjesi boıynsha bas jattyqtyrýshy Erlan Estek bastaǵan baspkerlik keńes «Álem Barysynda» el namysyn qorǵaıtyn balýandardy iriktedi. Olar: tórt dúrkin álem chempıony jáne Qazaqstan Barysy jeńimpazy Aıbek Nuǵymarov, álem chempıony jáne Qazaqstan Barysy týrnıriniń jeńimpazy Muhıt Tursynov, jas ta bolsa, bolashaǵynan zor úmit kúttiretin Aıbat Seıten jáne Dáýren Nuralınov. Sonymen qatar, bıylǵy Qazaqstan Barysy jeńimpazy Elaman Erǵalıev, tanymal túıe balýan Erjan Shynkeevtiń qatysýy da tek múmkin.
"Álem Barysy" osymen ekinshi ret ótkeli tur. 2014 jyly alǵashqy týrnırge 35 eldiń apaıtós balýandary qatysty. Olardyń arasynda dzúdodan álem jáne Olımpıada chempıony chex Lýkash Krpalek, sambodan álem chempıony armenıalyq Garıbán Arýtún, dzúdodan álem chempıonatynyń júldegeri nemis Raımýnd Gırds, kýrashtan álem chempıony ızraldyq Gregorı Rýdelson, alyshtan Azıa chempıony parsy Mýhammad Teımoýrı Sarah, Olımpıada jáne álem chempıonatynyń júldegeri kýbalyq Oskar Rene Vıdal Braıson jáne taǵy basqa ataqty balýandar boz kilemge shyqqan edi. Tartysty báseke nátıjesinde altyn belbeý men júz myń AQSH dollardy kýbalyq Braıson ıelendi. Ekinshi orynda Aıbek Nuǵymarov, úshinshi satyda reseılik Maksım Shıráev. Úsh jyl buryn xalyqaralyq týrnır retinde tusaýy kesilgen "Álem Barysy" búginde qazaq kúresinen absolútti álem chempıonaty deńgeıine ósti.
Birinshiliktiń jalpy júlde qory 30 mıllıon teńge. Onyń ishinde 15 mıllıony jeńimpazǵa tıesili. Dástúr boıynsha, altyn, kúmis jáne qola belbeýler de qarastyrylǵan. Jankúıerler de júldesiz qalmaıdy. Kórermender arasynda Renault Logan avtokóligi oınatylady.
Álemniń túkpir-túkpirinen qatysýshylar Astanaǵa kele bastady. Búginde Avstralıa, Jańa Zelandıa, Qytaı jáne Gana balýandary Elordaǵa jetti. Jarys sharty boıynsha, barlyq qatysýshylarǵa qazaq kúresinen arnalǵan sporttyq kúrteshe men aıaq kıim berilýde. Balýandarǵa fotossessıa uıymdastyrylyp, sheteldik tóreshilerge qazaq kúresiniń erejeleri boıynsha semınar ótkiziledi.
