Muhtar Áýezov atyndaǵy Qazaq Memlekettik akademıalyq drama teatry Elbasy N.Á.Nazarbaevtyń bastamasymen qabyldanǵan «Rýhanı jańǵyrý» baǵdarlamasy aıasynda QR Mádenıet jáne sport mınıstrliginiń qoldaýymen Tokıoda «Aqtastaǵy Ahıko» spektaklin japon kórermenderiniń nazaryna usyndy dep habarlaıdy Qamshy.kz aqparat agenttigi teatrdyń baspasóz qyzmetine silteme jasaı otyryp.
«Aqtastaǵy Ahıko» spektakline deıin aldymen teatr mýzeıinen oryn alǵan qundy jádigerlerimiz ben ulttyq qundylyqtarymyzdy tanytatyn kórme uıymdastyryldy. Qoıylym basynda sóz alǵan teatr dırektory Erlan Bilál tuńǵysh ret Qazaq drama teatrynyń Japonıada ótken premerasy Memlekettik baǵdarlamanyń "Jahandaǵy zamanaýı qazaqstandyq mádenıet" jobasy boıynsha júzege asyrylyp otyrǵanyn aıtty.
«Aqtastaǵy Axıko» qoıylymyn tamashalaýǵa Tokıo turǵyndarymen qatar Japon parlamenti lıgasynyń tóraǵasy Takeo Kavamýra, Japon mádenıet qorynan Iosýke Kýkýsabe syndy memlekettik qaıratkerler de bar. Tipti qazaq teatr ónerin tamashalaýǵa Japonıanyń kóne qalasy Osýkadan da bir top koreılik kórermender arnaıy kelgen. Belgili teatr synshysy Nakamýra Ioshıxıro men tanymal aktrısa ári xalyqaralyq dostyqty damytý ortalyǵynyń ókili Iýko Takıgýchı qoıylymǵa joǵary baǵa berdi.
Nakamýra Ioshıxıro: «Meniń eń birinshi baıqaǵanym, dramatýrg Japonıany óte jaqsy biledi eken jáne drama jazý barysynda kóp zertteýler jasap, júregimen tebirene otyryp jazǵan eken. Ekinshiden, Ana rólin somdaǵan aktrısa – anaǵa ǵana tán meıirimi men jylýyn shashý arqyly obrazdy asa úlken, qasıetti deńgeıge kótergen. Osy kúnge deıin men alty myńǵa jýyq spektákl kórgen ekenmin, sonyń ishinde bul dramadan alǵan áserim erekshe. Túsingenim - adamdar ultqa, násilge bólingenmen, júrektegi meıirim bireý, jáne onda shekara joq. Maǵan bul spektákldi kórý úshin aýdarma qajet emes edi, búkil adamzat basyna túsken mundaı problemany júrekpen sezinesiń» - dedi.
Japonıa mádenıet qory atynan baǵa bergen Iosýk Kýkýsabe Ahıko rólin somdaǵan Dýlyǵa Aqmoldany, Ana rólindegi Danagúl Temirsultanovanyń sheberlikterine tánti bolǵanyn jetkizdi. Sonymen qatar bul dramanyń búkil adamzat tarıhyndaǵy qara tańba – konslager taqyrybyn qozǵaý arqyly qazaq nemese japon ulty deńgeıinen shyǵyp, adamzattyq aýqymdy baǵyndyrǵanyn málimdedi. «Bul tragedıa qaıtalanbas úshin osyndaı kórkem dúnıeler arqyly árqaısymyzdyń esimizge sol bir surapyl kúnderdi salyp otyrǵan lázim» dedi ol.
Al Halyqaralyq dostyqty damytý ortalyǵynyń ókili jáne Japonıadaǵy tanymal aktrısa Iýko Takıgýchı bolsa, spektákl barysynda kóz jasyn bir sát te tyıa almaǵanyn aıtty. Ol teatrymyzdyń aktrısasy Danagúl Temirsultanovaǵa úlken qurmetpen raxmet aıtty. Aqtamaq ana obrazy oǵan erekshe áser etken eken. «Ana retinde sizge mundaı kúrdeli, tragedıaly obrazdy somdaý qıyn bolǵan joq pa?» dep surady ol. Danagúl Temirsultanova: «Ondaı jaǵdaıdy eshbir ananyń basyna bermesin.Analar eshqashan jylamasyn, ondaı qasiretti jyldar qaıtyp oralmasyn. Meniń maqsatym – kórermenderdi osy oı-baılamǵa jeteleý» dep jaýap berdi. Qarlag zertteýshisi, profesor Nurlan Dýlatbekov myrza «Aqaıdyń Qaseni obrazy arqyly qazaq halqynyń uly rýhyn kórsetip, álemge tanytýdy maqsat ettik» - dep atap ótti.
Qoıylym Tokıoda anshlagpen ótti. Kelgen kórermenderdiń kópshiligi sahnada bolyp jatqan oqıǵa tereńine súńgip, kóz jastaryna erik berýmen boldy. «Japondyqtardyń asa ustamdy, Kez-kelgen nárseni salqynqandylyqpen qabyldaıtyn halyq, emosıalaryn bulaı ashyq shyǵarýy sırek kezdesetinin aıtqan Qazaqstannyń Japonıadaǵy elshilik qyzmetkerleri: «Bul - sizder úshin, sizder ǵana emes búkil qazaq halqy úshin jeńis, bizdiń ortaq jeńisimiz» dedi. Al qoıylym sońynda zaldan Ahıko Tesýranyń ózi shyqqanda kórermen qurmetinde shek bolmady. Ol japon-qazaq tilinde kórermenge raxmet aıtty. Osylaısha Axıko jáne onyń ómirin el júregine jetkizgen «Aqtastaǵy Axıko» qoıylymy búginde eki el arasyndaǵy dostyqtyń sımvolyna aınaldy.
Jalpy Qazdramteatr usynǵan «Aqtastaǵy Axıko» qoıylymyna japondyqtardyń qyzyǵýshylyǵy zor. Ony bir aı buryn jergilikti telearna, gazet, jýrnaldarda jarıalanyp jatqan maqalalar kýá.
Japonıaǵa sapar barysynda Qazaq drama teatry ujymy Japonıa mádenıet qorynyń Basqarma tóraǵasy Ando Hıroıasý myrzamen kezdesip, bolashaqta mádenıet, teatr salasynda ózara baılanysty nyǵaıtý jóninde ýaǵdalasty. Sonymen qatar teatr synshylary, Japonıanyń No, Kabýkı, Sýzýkı syndy drama teatr ókilderimen de kezdesýler ótti. Saxalın áskerı tutqyndary men onyń týystarymen kezdesýler ótti. Alda Japonıanyń beldi teatr sańlaqtarymen kezdesip, ózara tájirıbe almasý, olardyń sheberlik synyptaryna da qatysý josparlanyp otyr. Sonymen qatar jeltoqsannyń 25-inde «Uly Dala Eli» atty Ult rýhanıatyn ulyqtaıtyn konserttik baǵdarlama men «Aqtastaǵy Axıko» spektaklin japondyqtardyń nazaryna usynylyp, teatr mýzeıinen ákelingen ulttyq jádigerler kórmesi uıymdastyrylady.
