Yntymaqtastyq keńesi EO men Qazaqstan arasyndaǵy Keńeıtilgen áriptestik jáne yntymaqtastyq týraly kelisimniń tabysty júzege asyrylýyn quptady. Ol saýda jáne kedendik retteý, qorshaǵan orta jáne klımattyń ózgerýi, energetıka jáne jasyl ekonomıka, sondaı-aq zań ústemdigi men ádilsot tóreligi sıaqty salalardy qamtıdy. Yntymaqtastyq keńesi EO men Qazaqstan arasyndaǵy ózara qarym-qatynas pen yntymaqtastyqty nyǵaıtýǵa, atap aıtqanda, aımaqtyq turaqtylyq pen damýdy qamtamasyz etýge múddeli ekendigin rastady.
Yntymaqtastyq keńesi sondaı-aq saıası, ádilsot jáne ekonomıkalyq reformalar men saýda-ekonomıkalyq qatynastar sıaqty eki tarap úshin mańyzdy taqyryptardy talqylady. Kezdesýde tıimdi basqarý, adam quqyqtaryn qorǵaý jáne azamattyq qoǵammen yntymaqtastyq máseleleri qarastyryldy. Sonymen qatar, terorızmge qarsy kúres úshin qajetti qaýipsizdik sharalary adam quqyqtary men bostandyqtaryn qurmetteý tıistigi atap ótildi.
Yntymaqtastyq keńesi Ortalyq Azıadaǵy aımaqtyq yntymaqtastyqtyń aǵymdaǵy oń jetikstikterin quptady. EO Ortalyq Azıa úshin jańa Strategıasyn 2019 jyly qabyldaıtynyn jarıalap, atalǵan strategıa aımaqtaǵy ózgerip jatqan saıası jáne áleýmettik-ekonomıkalyq ózgeristerdi eskeretinin málimdedi. Sonymen qatar shekarany basqarý, terorızmge jáne esirtki aınalymyna qarsy kúres sekildi máselelerdi qamtıtyn Aýǵanstanǵa qatysty aımaqtyq qaýipsizdik ahýaly da talqylandy.
Kezdesý Qazaqstan Respýblıkasynyń Syrtqy ister mınıstri Qaırat Ábdirahmanovtyń tóraǵalyǵymen ótti. EO tarapyn qazir EO Keńesińde tóraǵalyq etýshi Bolgarıanyń sot reformasy boıynsha Premer-mınıstriniń orynbasary, Syrtqy ister mınıstri Ekaterına Zahareva basqardy.
Yntymaqtastyq keńesi aıasynda Eýropalyq Odaqtyń Joǵarǵy Ókili Federıka Mogerını Qazaqstan Respýblıkasynyń Syrtqy ister mınıstri Qaırat Ábdirahmanovpen ekijaqty kezdesý ótkizdi. Kezdesý barysynda taraptar EO-nyń Ortalyq Azıaǵa qatysty jańa strategıasynyń keleshegindegi ekijaqty jáne aımaqtyq damý máselelerin talqylady.
Aıta ketsek, Astanada, EO pen Qazaqstan Respýblıkasynyń arasyndaǵy Keńeıtilgen áriptestik jáne yntymaqtastyq týraly kelisimine (KÁYK) 2015 jyldyń 21 jeltoqsanynda qol qoıyldy. KÁYK-niń negizgi bólimderi 2016 jyldyń 1 mamyrynan bastap ýaqytsha kúshine ene bastady. Kelisim 29 saladaǵy yqpaldastyq aıasyn keńeıtip, EO pen Qazaqstan arasyndaǵy saýda-ekonomıkalyq jáne ınvestısıalyq, energetıka, kólik, qorshaǵan ortany qorǵaý jáne klımattyń ózgerýi, jumyspen qamtý, eńbek qatynastary, mádenıet, bilim jáne ǵylymı zertteý salalaryndaǵy yqpaldastyqqa jol ashty. 1991-2014 jj. aralyǵynda EO Qazaqstanda jalpy somasy 180 mln quraıtyn 350-den astam jobany tikeleı qarjylandyrdy. Bul jobalar QR Úkimetiniń ár túrli mınıstrlikteri,vedomstvolary men komıtetterine saıası keńes jáne tehnıkalyq kómekke baǵyttaldy.
