«Aq jol» fraksıasy Ulttyq qordyń qarajatyn anaǵurlym yjdahattylyqpen paıdalanýǵa kóshýdi quptaıdy – bul týraly Azat Perýashev 2018-2020 jyldarǵa arnalǵan respýblıkalyq búdjetke ózgerister men tolyqtyrýlar engizý týraly zań jobasyn talqylaý barysynda málimdedi.

Óz sózinde «Aq jol» partıasynyń kóshbasshysy Memleket basshysynyń joldaýyn jáne bes jańa áleýmettik bastamany iske asyrýǵa baǵyttalǵan búdjet túzetýlerin qoldap, bul týrasynda fraksıanyń ustanymyn bildirdi.

«Taýar naryqtaryndaǵy ahýaldyń jaqsarýyna jáne munaı baǵasynyń ósýi boljamynyń bolýyna oraı Ulttyq qordy kezeń-kezeńmen tolyqtyrýǵa múmkindiktiń paıda bolý faktisi asa mańyzdy kóńil qýantarlyq sát bolyp sanalady.

Sonymen qatar, úkimettiń aǵymdaǵy ekonomıkalyq múmkindikterge súıene otyryp, Ulttyq qorǵa qosymsha saýaldar joldaýdan bas tartqanyn pozıtıvti fakt retinde atap ótý kerek», - dedi Perýashev.

Ol ótken jyldarda túrli maqsattar úshin qarajat alý ınvestısıalyq kiristerden áldeqashan asyp túsken kezde jáne Qordyń jınaqtaýshy bóligine qol suǵa bastaǵan sátte el úkimetiniń shamadan tys Ulttyq qordyń transfertterimen áýestenýin parlamenttik fraksıanyń birneshe márte synǵa alǵanyn eske sala ketti.

«Sondyqtan da, búgingi kúni «Aq jol» fraksıasy Ulttyq qordyń qarajatyn anaǵurlym uqypty paıdalanýǵa jáne onyń kiristerin arttyrýǵa kóshýdi sózsiz quptaıdy», - dep atap ótti depýtat.

Perýashev bul aqshanyń bizge emes, qazaqstandyq bolashaq jas urpaqqa tıesili ekenin basa aıtty.

«Bizdiń mindet – Ulttyq qor qarjysyn jumsap tastaý emes, ony arttyra túsý.

Tek bir-aq nárse túsiniksiz, nelikten osy bir qarapaıym ǵana aqıqatty uǵyný úshin osynshama uzaq ýaqyt qajet boldy», - dep ol óz oıyn tolyqtyryp ótti.

Budan basqa, «Aq jol» jetekshisi Memleket basshysynyń bes áleýmettik bastamasynyń birqatar qoǵamdyq suranysqa ıe basymdyqqa ıe máselelerdi sheshýge baǵyttalǵan qarajattyń bólinýin aıryqsha atap ótti.

«Jýyrda ǵana bolǵan depýttattardyń óńirlerge sapary aıasynda osy bes bastamany halyqpen talqylaý Prezıdenttiń bergen tapsyrmalary men onyń bizdiń otandastarymyzdyń basym kópshiligi úshin ózektiligi asa qajettilikke ıe ekenin anyq kórsetti.

Bizdiń fraksıa búdjettiń osy baptaryn qoldaýǵa daıyn, - dep málimdedi Perýashev.