«Samuryq-Qazyna» AQ-da 2018-2028 jyldarǵa arnalǵan jańa Damý strategıasy qabyldandy jáne Transformasıa baǵdarlamasy jańartyldy. Qujat operasıalyq jáne ınvestısıalyq qyzmeti tolyǵymen komersıaǵa baǵyttalǵan «Temasek» (Sıngapýr), «Khazanah» (Malaızıa)  jáne «Mubadala» (Birikken Arab Ámirlikteri) tárizdi tabysty táýelsiz qorlardyń tájirıbesin eskere otyra ázirlendi.

Jańa Strategıaǵa sáıkes, Qor Qorjyn kompanıalardyń kirisin kóbeıtý arqyly ulttyq ál-aýqatty arttyrýǵa basymdyq beremek.

«Samuryq-Qazyna» AQ jańa Strategıasynda úsh negizgi maqsatty belgiledi: kompanıalardyń tıimdiligin arttyrý, «Samuryq-Qazyna» portfelin (aktıvterdi) tıimdi basqarý jáne turaqty damý. Bul maqsattar 4 strategıalyq bastama arqyly júzege asyrylady:

Birinshi – kompanıalardyń qarjylyq turaqtylyǵyn nyǵaıtý arqyly kompanıalardyń tabystylyǵyn arttyrý, Transformasıa baǵdarlamasyn júzege asyrý jáne sıfrlandyrý, bıznes pen uıymdastyrý qurylymyn ońtaılandyrý arqyly áleýetti anyqtaý;

 Ekinshi -  qorjyn kompanıalardyń portfeldik qurylymyn ońtaılandyrý. Bul baǵytta Jekeshelendirý baǵdarlamasyn júzege asyrýdy aıaqtaý, ınvestısıalyq jobalar portfelin qaıta qarastyrý jáne strategıalyq emes aktıvterden shyǵý arqyly strategıalyq seriktesterdi tartý josparlanǵan;

Úshinshi – kiristi ártaraptandyrý. Bul qazaqstandyq bıznespen jáne sheteldik áriptestermen tıimdi birlesken ınvestısıalar arqyly jeke kapıtaldy damytýǵa baǵyttalǵan;

Tórtinshisi – korporatıvti basqarý jáne turaqty damý.

Osy maqsattardy iske asyrý - Qordyń jańa qurylymyn engizýge, qarjylyq turaqtylyqty nyǵaıtýǵa, ınvestısıalyq tartymdylyqty arttyrýǵa, qarjyny tıimdi basqarýdy qamtamasyz etýge jáne aktıvterdi ulǵaıtýǵa múmkindik beredi. Bul mindetterdiń sapaly júzege asýyn qamtamasyz etý úshin Qordyń aktıvter portfeli qaıta qurylymdanady. 
      Qazirgi ýaqytta, 332 kompanıany qamtıtyn Qordyń aktıvterdi basqarý júıesi qurylymy kúrdeli 5-6 deńgeıden turady.  Bul júıe basqarý jumysyn qıyndatýda. Sondyqtan, Jekeshelendirýdiń Keshendi josparyna sáıkes, Qor qurylymynan 51 kompanıa shyǵarylady. Túsken tabysty qaıta ınvestısıalaý barysynda taǵy 102 beıindi emes  kompanıa aktıvter qatarynan shyǵarylady.

Osylaısha, Qor qurylymyna kiretin kompanıalar sany 332-den 179-ǵa deıin qysqartylyp, basqarý deńgeıi kúrdeli 5-6 deńgeıden 3-ke deıin azaıady.  Nátıjesinde «Samuryq-Qazyna» Qorynyń basqarý qurylymy mobıldi bolady.

Jańa Strategıada halyqaralyq ınvestısıalar portfelin strategıalyq qadaǵalaýdy Qordyń Basqarý keńesi júzege asyratyny naqtylanǵan. Ekonomıkadaǵy shoǵyrlaný kórsetkishiniń tómendeýi, jergilikti ınvestorlardyń jylystamaýy, qordyń halyqaralyq deńgeıdegi ornynyń nyǵaıýy jáne tehnologıalar men bilim arqyly paıda tabý -  osy ınvestısıalardyń artyqshylyǵy bolmaq.

Jańa Strategıaǵa sáıkes, áleýmettik ınvestısıalar «Temasek» jáne   «Khazanah» kompanıalarynyń tájirbıesine negizdelip, tek bilim berýge,  «adam kapıtalyna» jáne ınovasıalar qurýǵa baǵyttalatyn bolady.

Esterińizge sala keteıik, 2018 jylǵy sáýirdiń 19-y, Qazaqstan Respýblıkasynyń Prezıdenti Nursultan Nazarbaev «Samuryq-Qazyna» ulttyq ál-aýqat qoryn basqarý jónindegi keńestiń otyrysynda «Samuryq-Qazyna» AQ 2018-2028 jyldarǵa arnalǵan jańa Damý Strategıasyn jáne jańartylǵan Transformasıa Baǵdarlamasyn maquldady jáne bekitti.

Sondaı-aq, Memleket basshysy Qordy damytýǵa baǵyttalǵan jumystarǵa oń baǵa berdi.