Búgin Semeı qalasynda dene shynyqtyrý-saýyqtyrý kesheniniń irgetasyn qalaý rásimi ótti. Sharaǵa oblys ákimi Berik Ýálı, «Samuryq-Qazyna» AQ basqarma tóraǵasy Nurlan Jaqypov qatysty.
Saltanatty sharada sóz sóılegen aımaq basshysy Prezıdent Qasym-Jomart Toqaevtyń qoldaýymen bastalǵan «Abaıǵa qurmet» aksıasy aıasynda júzege asyrylatyn jobanyń óńir turǵyndary úshin mańyzy joǵary ekenin atap ótti.
«Prezıdentimiz Qasym-Jomart Kemeluly Toqaevtyń bastamalary aıasynda halyqtyń ál-aýqatyn arttyrý, buqaralyq sportty damytý baǵytynda júıeli jumystar júrgizilýde. Memleket basshysy Qyzylordada ótken Ulttyq quryltaıdyń V otyrysynda buqaralyq sportty damytý – salaýatty ult qalyptastyrýdyń mańyzdy elementi ekenin atap ótti. «Abaıǵa qurmet» aksıasyn iri ınvestorlar da qoldap otyrǵanyn iltıpatpen aıta ketken jón. Atap aıtsaq, «KAZ Minerals» kompanıalar toby jańa shaǵyn aýdanda 18 myń kórermenge arnalǵan jańa stadıon qurylysyn bastap ketti. Osy úrdispen «Samuryq – Qazyna» AQ sport keshenin salýǵa óz qoldaýlaryn bildirip otyr. Bul – óńirimiz úshin úlken qýanysh. Bul joba turǵyndardyń sportpen turaqty aınalysýyna, jastardyń salaýatty ómir saltyn qalyptastyrýyna jáne buqaralyq sportty damytýǵa úlken serpin beredi. Atalǵan nysan – tek sport kesheni ǵana emes, ol – eldiń bolashaǵy sanalatyn jastardyń densaýlyǵyn nyǵaıtýǵa, jańa múmkindikter ashýǵa baǵyttalǵan áleýmettik mańyzy joǵary joba. Osy tóńirekte 15 myńǵa jýyq halyq turady. Bul – osy aýdanda salynǵaly turǵan alǵashqy sport kesheni. Qutty bolsyn», – dedi Berik Ýálı.
«Samuryq Qazyna» basshysy jańa nysannyń qala turǵyndary úshin mańyzdy ortalyqqa aınalatynyn atap ótti.
«Qazirgi ýaqytta «Samuryq-Qazyna» qorynyń qoldaýymen el boıynsha ashylǵan 19 iri sport nysany jumys istep tur jáne atalǵan keshenderde 700 myńnan astam adam sportpen aınalysýda. Sport ınfraqurylymyn damytý – qordyń negizgi áleýmettik jaýapkershilikteriniń biri. Sońǵy 8 jylda Abaı oblysynda 4,3 mlrd teńgege 19 áleýmettik joba júzege asyryldy. Biz bul jumystardy ári qaraı jalǵastyra beretin bolamyz. Búgin qurylysy bastalǵan nysan turǵyndardyń sportpen aınalysyp, densaýlyǵyn jaqsartýǵa yqpal etedi», – dedi ol.
Jańa nysan «Abaıǵa qurmet» aksıasy aıasynda «Samuryq-Qazyna» AQ-nyń biryńǵaı operatory Samruk-Kazyna Trust arqyly qarjylandyrylýda. Jalpy aýdany 2000 sharshy metr bolatyn eki qabatty ortalyqta ártúrli sport túrlerine arnalǵan zal, 100 kórermenge arnalǵan trıbýna, kúres jáne boks zaldary, trenajer zaly men qosalqy bólmeler qarastyrylǵan. Sport kesheni oń jaǵalaýda, Sátbaev kóshesinde salynatyn bolady. Keshen lıftpen jabdyqtalady, sonyń arqasynda ekinshi qabatqa barlyq kelýshiler, onyń ishinde múmkindigi shekteýli jandar úshin de qoljetimdi bolady. Jobany iske asyrýǵa shamamen 1,6 mlrd teńge bólý josparlanyp otyr.
«Abaıǵa qurmet» aksıasy aıasynda Almaty oblysy Semeı qalasyndaǵy Qaraǵaıly yqsham aýdanyndaǵy jańadan salynǵan saıabaqqa «Altyn adam» músinin ornatty. Mańǵystaý oblysynyń syılyǵy Dostyq úıiniń qurylysy júrgizilýde. Soltústik Qazaqstan oblysynyń syıy Rámizder alańynyń qurylysy Beıbitshilik aralynda qarqyndy júrgizilip jatyr. Túrkistan oblysy kórme ortalyǵyn, Qyzylorda oblysy «Anaǵa taǵzym» ǵımaratyn, Atyraý oblysy «Abaı álemi» ortalyǵyn, Aqtóbe oblysy Jekpe-jek saraıyn, Pavlodar oblysy ústel tenısi ortalyǵyn, Jetisý oblysy Semeıdiń kireberisine qala qaqpasyn, Batys Qazaqstan oblysy jelilik saıabaq, Qostanaı oblysy rýhanıat ortalyǵyn, Almaty qalasy medıaortalyq, Astana qalasy «Keleshek» mektebin salyp berse, Shyǵys Qazaqstan oblysy Ertis ózeni jaǵalaýyn abattandyrady. Shymkent qalasy shyǵarmashylyq ortalyǵymen qatar Semeı qalasynyń Vodnyı kentine Mádenıet úıin syıǵa tartpaq.
