Қ. Жақыпов Марокко Корольдігі Парламенті кеңесшілер Палатасының спикерімен парламентаралық ынтымақтастық мәселелерін талқылады    

      Мәжіліс Төрағасы Қабиболла Жақыпов Марокко Корольдігі Парламенті кеңесшілер Палатасының спикері  Мухаммад Аш-Шейх Биядилламен кездесті.

                Қабиболла Жақыповтың атап өткеніндей, Марокко Қазақстанның Солтүстік Африкадағы маңызды әріптестерінің бірі.

- Сондықтан біз Ислам Ынтымақтастық ұйымы, Экономикалық Ынтымақтастық ұйымы сияқты басқа да кеңестік-жиналыстық тетіктер мен аймақтық институттар аясында бірлескен күшімізді одан әрі үйлестіруді толықтай қолдаймыз,-деді Мәжіліс Төрағасы.

                Осы ретте Қабиболла Жақыпов Қазақстан Президенті Нұрсұлтан Назарбаев саясатының басым бағыттарының бірі – ұлтаралық келісім, бейбітшілік және толеранттылық ұстанымдарының маңыздылығы мен өзектілігіне баса назар аударды.

                Өз кезегінде  Мухаммад Аш-Шейх Биядилла Марокко Нұрсұлтан Назарбаевтың басшылығының арқасында қол жеткізген Қазақстан табыстарын жақсы білетінін және жоғары бағалайтынын тілге тиек етті. Және Елбасының «Қазақстан - 2050» Стратегиясы айрықша қызығушылық тудыратынын атап өтті.

Тараптар сондай-ақ, Астанада өтетін «ЭКСПО-2017» көрмесіне дайындық мәселелеріне де көңіл бөлді.

Мәжіліс Спикері көрменің «Болашақ энергиясы» деп аталатын атауының өзі энергия жетіспушілігі мен экологиялық қауіптің ғаламдық мәселелерін шешуге ықпал етсе, «ЭКСПО - 2017» энергетика саласындағы жаңа жетістіктерді паш етудің зор мүмкіндігіне айналатынын сеніммен айта келіп:

- Бұл көрмеге мароккондық әріптестеріміздің де белсене қатысатыны сөзсіз. Бізді Марокко Парламентінің «жасыл экономика» қағидатына көшуді заңнамалық қамтамасыз ету жолында атқарып жатқан жұмыстары қызықтырады, -деді.

Қабиболла Жақыпов пен Мухаммад Аш-Шейх Биядилла парламентаралық ықпалдастық жағдайын сөз ете келіп, бейінді комитеттер мен ынтымақтастық жөніндегі топтар арасындағы тұрақты іс-қимыл екіжақты қарым-қатынасты одан әрі нығайтуға ықпал ететіндігін жеткізді.

parlam.kz