Қазақ тілінде өзінің ана тіліндей емін-еркін көсіліп сөйлейтін, қазақша өлең жазатын, ата-бабамыздың салт-дәстүрін қадірлеп, қастерлей білумен қатар, ислам дінін қабылдап, мұсылманшылықты берік ұстанатын орыс жігіті Вячеслав Вавилин "Айқын" газетіне берген сұхбатында өзінің табысқа жетуінің құпиясымен бөлісті. Қамшы ақпараттық агенттігінің тілшісі орыс жігітінің өнегелі өмірі жайында ақпаратты оқырман назарына ұсынады.
Бүгінде «Генералдар кеңесі» республикалық қоғамдық бірлестігі төрағасының кеңесшісі қызмет атқаратын ол Қазақ көркемөнер академиясының академигі атанған.
Қазақ тілінде жай ғана емес, мақалдатып сөйлейтін орыс жігіті «Тілді меңгеру – өнер!» дейді өз сөзінде. Тіл үйренуге кішкентай кезінен бастап мән берген.
«Қазақ тілі еңбекпен алынды. Он екі жасымнан қазақша үйрене бастадым. Мира деген ұстазым болды. Тілді кішкентай кезден бастап насихаттау керек, меніңше, еліміздегі барлық балабақша қазақ тіліне өтуі керек, яғни, бастапқы білім қазақша берілсе, тілмен танысу арқылы балалар салт-дәстүрді меңгереді, тіл арқылы қазақ ұлтына деген жастайынан махаббаты оянады. Мектепті, жоғары білімді қай тілде алатынын әркім өзі таңдасын. Сонда ғана болашақта бір ғана мемлекеттік тілде сөйлейтін елге айналамыз», - деп қазақ тіліне деген махаббаты жайында айтып берді.
Вячаслав Алматыдағы №18 орыс мектебін бітірген. Қазақ-Америка университетінің заң факультетін 2002 жылы үздік дипломмен ағылшынша аяқтады. Қосымша Қазақ инженерлік-экономикалық университетінің қаржы және кредит факультетін бітірді.
2003-2004 жылдары Алматы қаласы Алмалы ауданы әкімінің бірінші орынбасарының кеңесшісі болып қызмет атқарды.
«Мемлекеттік қызметтің қай түрі болсын қазақ тілін білу мәжбүрлігін сезіндіреді. Жария айтылмаса да, іс қағаздары қазақ тілінде болсын деген талап бар. Қазір ірі мекемелердің бәрінде заманауи жабдықталған қазақ тіліне арналған кабинеті бар. Өкінішке қарай, басқа ұлт өкілдеріне қарағанда орыс тілді қазақтардың өз ана тілін үйренуге деген ұмтылысының жоғына таңқаламын», деп мемлекеттік тілдің маңыздылығы жайында айтты.
Біраз уақыт Жоғарғы сот төрағасы Қайрат Мәмидің көмекшісі болып еңбек еткен.
2005-2007 жылдары Халықаралық әуесқой бокс қауымдастығы Азия континентальдық АИБА бюросының вице-президенті, сонымен қатар Әлемдік әуесқой бокс қауымдастығы президентінің кеңесшісі болып қызмет етті.
Ал Ислам дінін қабылдауына діни кітапатарды салысытыра оқып жүргені себеп болған көрінеді:
«Сәби шағында адамның таңдауы жоқ. Анам да мені шіркеуге апарып, христиан қылды. Бірақ өсе келе, діни кітаптарды өзара салыстырып оқи жүріп, Библияда ақырғы пайғамбар Ахмадтың келетіні ап-анық жазылған аят барын білдім. Ахмет – Мұхаммедтің бір аты. 25 жасымда шаһадат айтып, Алланың қалауымен мұсылман болдым. Одан бергі 10 жыл ішінде мұсылман болғаныма рақаттанып жүрмін. Қазір тәжуид үйренудемін, толық меңгермесем де, Құранды арабша еркін оқи беремін. Бірнеше парасын жатқа білемін».
Бүгінгі таңда Қазақстан Көркемөнер академиясының академигі болған Вячаслав Вавилин: «Әлем шебері атағы бар суретші, мемлекеттік сыйлықтың иегері Амандос Ақанаев басқаратын Көркем академияның мені өздеріне мүше етіп қабылдап, академик етіп сайлауы – менің мемлекеттегі қызметтегі және қоғамдық өмірдегі еңбегімді, өнерге деген құрметімді қазақстандық мәдениетке қосқан бір үлесім ретінде бағалағандары. Ол үшін көп рақмет айтамын», дейді.
Екі жылдан бері «Генералдар кеңесінің» төрағасы, генерал-майор Рүстем Қайдаров мырзаның кеңесшісі қызметін атқарып келеді. Кеңестің мақсаты – ерлікті ұлықтау, ұрпаққа отаншылдық тәрбие беру. Кеңес құрамындағы генералдар саны 100-ден асады. Әр саладан зейнетке шыққан генералдардың басын қосқан бұл кеңес 2000 жылдың басында құрылған кеңес бірнеше игілікті жұмыстар атқарып келеді.
Мәселен, алдағы 31 мамыр күні Мәскеуде Кеңес Одағының батыры, қазақтан шыққан тұңғыш армия генералы, №1 Халық Қаһарманы, Қазақстанның ең алғашқы Қорғаныс министрі Сағадат Нұрмағамбетовтің мүсіні қойылмақ. Бүгінгі таңда кеңес мүшелері аталмыш шараға дайындық үстінде.
«Бұл – мәскеуліктер үшін ғана емес, күллі еліміз үшін маңызы үлкен шара», дейді ел азаматы сұхбат беру барысында.
Вячаслав 2009 жылы үйленген екен. Бір ұл, бір қызы бар. Ұлының атын алғашқы пайғамбардың есімімен Мұхаммед әмин деп өзі қойған.
Дайындаған: Гүлім Жақан
