Жамбыл атындағы Қазақ мемлекеттік филармониясының алдында халық ақыны Сүйінбай Аронұлының 200 жылдығына орай еңселі ескерткіші бой көтерді. Бұл туралы Қамшы порталы Айқын-ақпаратқы сілтеме жасай отырып хабарлайды.

Тастұғырдың тұсаукесер рәсімін шаһар басшысы Бауыржан Байбек пен Сенат депутаты, Қазақстан Жазушылар одағы басқармасының төрағасы Нұрлан Оразалин ашты. 

Бауыржан БАЙБЕК, Алматы қаласының әкімі:
– Елбасы Нұрсұлтан Назарбаев  «қа­зақтың бүкіл тарихы – бірігу та­рихы, тұтастану тарихы» деген бо­ла­тын. Сүйінбай бабамыздың да жыр­лары халықты ауызбірлікке, тұ­тас­тыққа шақырады. Ақынның көп­тің мұңын айтып, «бөрілі байрақ ас­тына исі қазақ баласын бірік­тір­сем» деген идеясы бүгінгі таңда жү­зеге асып отыр. 

Сүйінбай ақынның 200 жылдық мерейтойы еліміздің бар­лық өңірлерінде аталып өтуде. «Нұр Отан» партиясының ұйыт­қы болуымен Астана қаласында өткен ғылыми-тәжірибелік кон­ференция мереке­-лік концертке ұласты. Сондай-ақ партияның қолдауымен қаламгер аға­мыз Роллан Сейсенбаев «Ұлы жазу­шылар мен ойшылдар» се­рия­сымен Сүйінбай мен Жамбыл ата­ларымыздың жыр жинағын басып шығарды. 
Ұлы Мұхтар Әуезовтің шайырды Жетісу ақындарының ал­тын дің­гегіне теңеуі кездейсоқтық емес. Ақынның қайраткерлік келбеті әйгілі Қатағанмен айтысында жан-жақты көрінсе, Май­лықожа, Те­зектө­ре­мен болған сөз сайысында оның батырлық рухы, қайсар мінезі сұлу жыр болып төгілді. Ол – айтыс өнерін жа­ңа биікке көтеріп, тақырып аясын кеңейткен жасампаз тұлға. Заманы қайшылықтарға толы бабамыздың Сұраншы, Саурық, Өтеген, Қарасай батырларға арналған тарихи жыр-толғаулары халықты отаршылдыққа қарсы тұруға ша­қырды. Тәуелсіз ел болуға үндеді. Ерлікті, бірлікті жырлады. Сүйінбай­дың ақындығы тек қазақ қауымдығына емес, көрші Орта Азия халықтарына да жақсы таныс болды. Ол қазақ-қырғыз халық­тарының достық қарым-қатынасын нығайтуға ерекше үлес қосты. «Манас», «Рүс­тем-Дастан»,«Тотынама» сияқты екі ел ара­сында кең тараған эт­никалық дастандарды өзінше мәнер­мен таңды-таңға ұрып жырлады. 
Ұлы бабаларымыздың асқақ армандары орындалып, еліміз Тәуел­сіздікке қол жеткізді. Енді олардың шығармаларын тү­гендеп, рухына арнап ескерткіштер қойып жатырмыз. Айбынды айтыскер ақын, адуынды жыршы, қазақ поэзиясының алыбы Сүйінбай Аронұлының құрметіне арналған ескерткіштің ашы­луы құтты болсын!
Бұдан кейін сөз алған Алматы облысының әкімі Аман­дық Баталов Сүйінбай Аронұлының Алматы облысы, Жамбыл ауданы Қарақастек жерінде туылғанын айта келіп, мерейтой қар­саңында атқарылып жат­қан істерге тоқталып, халықты алдағы жоспарлармен құлағдар етті.
– Астана қаласында «Нұр Отан» партиясының қолдауы­мен және Халықаралық Түркі академиясының ұйымдасты­руымен «Алатаудың ақиығы» атты халықаралық конферен­ция өтті. Одан кейін Елбасының тапсырмасымен Алматы об­лысынан бір топ делегация және Сүйінбай атындағы филар­мония артистері Түркияға барып, екі-үш қаласында концерт берді. Анкара қаласының дәл төрінде түркітілдес халықтар арасында атағы жайылған ақынның құрметіне керемет саябақ ашылды. Бізді Қазақстанның Түркиядағы елшісі Жансейіт Түй­мебаев пен ТҮРКСОЙ-дың бас хатшысы Дүйсен Қасейінов ерекше қолдады. Сол жолы аталмыш саябаққа «бабамыздың ескерткішін қоямыз» деп уәде беріп келдік. Қазір осы мақсат­та жұмыс істелуде. Бұдан бөлек, той қар­саңында ауылдың жолын жөндеп, Сүйінбай атамызға мектептің атын бердік. Алдағы қазан айында ас өткізіп, бәйге ұйымдастырамыз, – деді Амандық Ғаббасұлы. 
Жиын барысында ақын-жазушы Нұрлан Оразалин, Роллан Сей­сен­баев және Ұлттық Ғылым академиясының құрмет­ті академигі Төлеген Қожамқұлов, М.Әуезов атындағы Әдебиет және өнер инсти­тутының директоры Уәлихан Қалижан сөз сөй­лесе, белгілі ақын Серік Қалиев жырдан шашу шашты. 
«Сөздің пірі  – Сүйінбай» аталған екінші бөлімді гастроль­дік-концерттік бөлім басшысы Амантай Берғалиев жүргізіп, Сүйін­бай Аронұлының өсиет-термелеріне кезек берді. Н.Тілендиев атындағы академиялық фольклорлық-этногра­фия­лық «Отырар сазы» оркестрі, әнші-жыршы Ерболат Шалды­беков, Мақпал Тоқтаған және басқа да дәстүрлі әншілер өнер көр­сетіп, соңынан ақын рухына Құран ба­ғышталды. 
Мекеме директоры Ақан Әбдуәлінің айтуынша, «Менің пірім – Сүйінбай, сөз сөйлемен сыйынбай» деп жырлаған Жамбыл мен ұстазы Сүйінбайдың рухының бір жерде тоғысуы – қуанарлық жағдай. Кейінгі жастарға – тағлым, ұрпаққа –  өнеге!