Қара теңіздегі КТК терминалына жақын маңда Қазақстан мұнайын күтіп тұрған екі танкерге дрондар соққы жасады. Зардап шеккендер болмады, бірақ ел экспортына басты бағыт саналатын КТК қауіп астында қалды.

Не белгілі?

Reuters агенттігі сейсенбі күні екі мұнай танкеріне шабуыл болғанын хабарлады. Оқиға Каспий құбыр консорциумының (КТК) теңіз терминалына шамамен 30 миль (шамамен 48 км) жерде болды.

Delta Harmony танкерін грек компаниясы Delta Tankers басқарды, ол Теңізшевройл мұнайын тиеуді күтіп тұрды. Екінші кеме — Matilda — Thenamaris компаниясы басқарды, ол Қарашығанақ мұнайын тиеуді жоспарлады.

Thenamaris өкілі Matilda кемесіне екі дрон соққы жасағанын растады. Адамдар зардап шеккен жоқ, палубалық құрылымдар аздап зақымданды, бұл зақымды толық жоюға болады деді өкіл. Шабуылдан соң Matilda ауданнан шықты.

Неге бұл маңызды?

КТК арқылы Қазақстан мұнай экспортының шамамен 80 пайызы өтеді. Бұл бағыттың тұтастығына соққы тисе, елдің энергетикалық қауіпсіздігіне, бюджет кірісіне және ірі жобалардың жеткізу тізбегіне әсер етуі мүмкін.

29 қараша 2025 жылы Новороссийск порты маңындағы КТК теңіз инфрақұрылымына да шабуыл болған еді. Соның салдарынан ВПУ-2 айлағы қатты зақымданып, толық жөндеу аяқталғанша істен шығарылды.

Ресми реакция және балама бағыттар

Энергетика министрлігі мен КТК консорциумының ресми түсініктемесін редакциялар күтіп отыр. Бұған дейін министрлік экспорт көлемін балама маршруттарға уақытша қайта бұру жоспарын жеделдеткенін мәлімдеген еді.

Мұнай нарығын жіті бақылайтын инвесторлар мен тасымалдаушылар тәуекел картасын қайта есептеп жатыр, ал тасымалдау құны мен сақтандыру сыйақылары қысқа мерзімде өсуі мүмкін.

Бұл туралы Qamshy.kz ақпарат агенттігі хабарлайды.