Иранда жаппай үкіметке қарсы наразылықтар кезінде интернеттің кең көлемде өшірілуіне байланысты Илон Масктың Starlink спутниктік байланыс жүйесі ел тұрғындарына сыртқы әлеммен байланыс орнатуға көмектесіп жатыр. Сарапшылардың айтуынша, наразылықтар мен күштік құрылымдардың әрекеттері туралы фото-видео материалдардың сыртқа шығуына Starlink маңызды рөл атқарған.

Ресми лицензиясыз жұмыс істесе де, Starlink терминалдары Иранға жасырын түрде жеткізіліп, 2022 жылдан бері қолданылып келеді. АҚШ билігі бұған дейін санкцияларды айналып өтіп, ирандықтарға байланыс құралдарын пайдалануға рұқсат берген. Жақында АҚШ президенті Дональд Трамп Starlink арқылы Иранда интернетті қалпына келтіру мүмкіндігін қолдайтынын білдірді.

Иран билігі Starlink сигналдарын бұғаттауға және құрылғыларды тәркілеуге тырысып жатыр. Бұл жағдай халықаралық деңгейде пікірталас туғызып, жеке компаниялардың мемлекет егемендігіне араласуы жөнінде құқықтық сұрақтар көтерілді. Бұған дейін БҰҰ-ның Халықаралық байланыс одағы Starlink-тің Ирандағы қызметін заңсыз деп таныған.