UBT-nyń alǵashqy kúni test tapsyrmalary zańsyz túrde ınternet arqyly syrtqa shyǵyp jatyr. Talapkerler suraqtardy syrttaǵylardan kómek surap nemese «endi tapsyratyndarǵa kómek» etip jarıalaǵan, - dep habarlaıdy Qamshy.kz Azattyqqa silteme jasap.
Qazaqstanda mektep bitirýshiler 2-9 maýsym arasynda tapsyratyn ulttyq biryńǵaı testiniń (UBT) birinshi kúni-aq eldegi jastar kóp qoldanatyn «VKontakte» jáne «Moı mır» áleýmettik jelisinde bıylǵy emtıhan suraqtary jarıalanyp jatyr. Tapsyrmalardyń kóbi uıaly telefonǵa sýretke túsirilgen. Synaq tapsyrý erejesi boıynsha talapkerlerge aýdıtorıa ishinde uıaly telefon alyp kirýge tyıym salynsa da, tyıymdy aınalyp ótýdiń amalyn tapqandar az emes sıaqty.
Áleýmettik jeliden bólek WhatsApp pen Viber baılanys baǵdarlamalary arqyly da test tapsyrmalary tarap ketken.
«VKontakte» jelisinde Qazaqstan tarıhy, matematıka, qazaq tili, orys tili, fızıka, geografıa, bıologıa pánderiniń tapsyrmalary foto retinde jarıalanǵan. Jarıalanǵan test saýaldary – qazaq jáne orys tilinde.
Byltyr Qazaqstanda grantqa túskenderdiń tizimin ınternette mınıstrlikten buryn jarıalaǵan «Artem» esimdi ınternet qoldanýshy bıyl da óz forýmynda «2014 jyly keletin UBT tapsyrmalaryn» jarıalap top-tobymen shyǵaryp jatyr.
Onyń aıtýynsha, «bul testerdiń barlyǵy maýsymnyń 2-si kúni kelgen». «Artem» óz forýmynda «aldaǵy ýaqyttarda taǵy da test tapsyrmalaryn jarıalaıtynyn» jazǵan.
«Artemniń» kim ekeni jáne UBT saýaldary men oqýǵa túsýshilerdiń tizimin qandaı jolmen qolyna túsirgeni áli anyqtalmaǵan.
«ÁR KÚNİ ÁRTÚRLİ NUSQA KELEDİ»
UBT ótkizýge jaýapty Qazaqstan testileý ortalyǵynyń dırektory Qalı Ábdıev Azattyqqa bergen suhbatynda ár kúnge ár túrli nusqalar daıyndalǵanyn aıtty.
«Tapsyrmalarda bir-eki bettiń jaýaby bar. Olardy biz kórdik. Bir-eki sýrette turǵan eshteńe joq. Bastysy onda jaýaby joq. Biraq bul keı óńirlerde tártip buzylǵanyn bildiredi. Kóbi telefonǵa túsirip, shyqqan soń jarıalaǵan sıaqty.
Testiń alǵashqy kúni telefon qoldanyp aýdıtorıadan shyǵarylǵandar men nátıjeleri joıylǵan oqýshylar bar. Naqty derekti aldaǵy kúni jarıalaımyz. Al birinshi kúni kelgen test nusqalary ekinshi kúni kelmeıdi. Ár kúnge nusqalary bólek-bólek kitapshalar daıyndalǵan» dedi testileý ortalyǵynyń basshysy Azattyq tilshisine.
Al Shyǵys Qazaqstan oblysy Tarbaǵataı aýdanyndaǵy mektepterdiń birinde sabaq beretin muǵalimi Gúlfaırýz Saparǵalıeva paıymdaýynsha, UBT-ny birneshe kúnge sozbaı bir-aq kúnde ótkizý kerek.
«Qazaqstanda UBT – úlken naýqan, talaı adamnyń taǵdyryna sebep syn. Bilim jáne ǵylym mınıstrligi, ishki ister organdary bul synaqtyń taza ótýi úshin bar jaǵdaıdy jasap jatqanymen kóp jaıttarda jaýaptar satylyp, suraqtar syrtqa shyǵyp jatyr. Jalpy UBT-ny bir, uzaǵanda eki kúnde ótkizýdi qarastyrǵan jón» deıdi mektep muǵalimi.
Bilim jáne ǵylym mınıstrligi UBT óter aldynda WhatsApp pen Viber sıaqty baılanys quraldary arqyly aqparattyń syrtqa shyǵyp ketýi múmkin ekenin aıtqan edi.
Al maýsymnyń 2-i kúni UBT aldynda baspasóz máslıhatyn ótkizgen bilim jáne ǵylym vıse-mınıstri Tahır Balyqbaev: «Qaýipsizdik máselesi – óte mańyzdy. Ár aýdıtorıa aldynda baılanys quraldaryn buǵattaıtyn qurylǵylar ornatylǵan. Test ótkizýge ishki ister mınıstrligi men memlekettik komısıa qyzmetkerleri de tartyldy» dep málimdegen.
