Túnde Almatydaǵy Alǵabas yqsham aýdanyndaǵy turǵyn úıdiń birinen adamdar shuǵyl shyǵaryldy. 200-den astam turǵyn tún ishinde kóshirilip, qala ákimdig kelisken qonaq úılerge ornalastyryldy.
Alǵabastaǵy úılerdiń deni memlekettik baǵdarlamamen baspanaǵa muqtaj azamattarǵa berilgen bolatyn. Turǵyndardyń ishinde múgedekter men kóp balalylar, aýyr naýqastar da bar.
9 qabatty, eki podezdi úıdiń qısaıǵanyn baıqaǵan turǵyndar tún ishinde ulardaı shýlap dalaǵa shyqqan. Qazir úıdi polısıa kúzetip tur. Qala basshylyǵy arnaıy komısıa qurylyp, máseleniń mán-jaıyn anyqtaıtynyn aıtqan.
«Kez-kelgen joba memsaraptamadan ótedi, sosyn baryp qurylysty salýǵa MSQB ruqsat alady. Komısıa qurylatyn bolady, komısıa quramyna MSQB, TJ, ákimdik ókilderi jáne kerek bolyp jatsa bizde kirýimiz múmkin. Tótenshe jaǵdaı kezinde erejeler osyndaı. Qaraǵandyda mundaı bolǵan. Bizde Almatyda mundaı birinshi ret. Kóptegen jaǵdaılar: Tashkentte, Shymkentte bolǵan. Onda topyraq shókken. Ol bylaı bolýy múmkin - jer astynda jerasty sýlary bolady, olar arnasyn aýystyrady. Qurylys kezinde barlyǵy durys bolady, ol jerde jer asty ózeni joq, bes-alty jylda bir ótedi, árqalaı bolady, keıde 20 jylda ótýi múmkin, jáne jer asty sýlary "oınaqtaıdy". Bos keńistik paıda bolady. Negizinen osyndaı. Shymkentte mundaı bolǵan. Ol jaqtardy topyraq shókken. Qumdardyń shógýin anyqtaý múldem múmkin emes»,-deıdi qalalyq sáýlet jáne qala qurylysy basqarmasynyń basshysy Ǵabıt Sadyrbaev.
Turǵyndardyń birshamasy túnde páterlerinen baǵaly zattary men azyq-túlikterin alyp shyǵa almaǵandyqtaryn, ákimdik bergen qonaq úılerdiń las ekendigin aıtyp shaǵymdanýda. Polısıa turǵyndardy úılerine kirip, kerek zattaryn alýǵa múmkindik bermegen kórinedi.
«Biz ol jaqta qala almadyq. «Shaǵan» qonaqúıi óte las, temeki ıisi sińip qalǵan, ol jaq beıbereket, erler men áıelder jynystyq qatynasqa túsýde,aıǵaılaıdy, baqyrady. Ol jerde qalaı qalasyń? Meniń kishkentaı nemerem bar. Bizge kólikte qonýǵa týra keldi. Bizdi kishkentaı bólmege ornalastyrdy. Men, ulym, kelinim jáne kishkentaı nemerem bar, biz onda jata almadyq. Bizdiń páterimizde qujattarymyz, azyq-túlik, barlyǵy qaldy, endi bizdi onda jibermeýde. Endi ne kúterimizdi bilmeımiz, sirá jaqsylyqty kútý beker shyǵar», - deıdi turǵyndardyń biri.
Turǵyndardyń dalada qalý qaýipi kórshi úıde de bar. Zamıra Maksýmovanyń aıtýynsha olardyń da úıinde jarylǵan jerler bar jáne de jertólede keı kezderi sý jınalady.
Al, keshe Astanada jaz maýsymynyń ashylýyna oraı «Bolashaq energıasy» taqyrybymen Astana Open Air degen konsert ótti. «Astana-arena» stadıonynda ótken ol konsertte reseılik jartylaı jalańash ánshiler sahnaǵa shyǵyp, ol «Qazaqstan» ulttyq arnasynan tikeleı efır arqyly kórsetildi. Konsertti uıymdastyrýshylardyń qateliginen jınalǵan kópshilik birin-biri ıterip, birneshe adam taptalyp qala jazdaǵan. Osylaısha, Almatydaǵy shalaǵaı isi biraz turǵyndy áýrelegen Ahmetjan Esimov Astanaǵa baryp ta eshteńeni jyrǵatyp jatpaǵan sıaqty. EKSPO-nyń konsertine barǵandar da, ulttyq arna ekranynan kórgender de Esimovtiń bul essizdigine narazylyq bildirýde.
Bul jerde bir ákimdi kinalaǵanmen is bitpesi anyq. Túbi júıe ózgermeı, ákim túzelmeıtinin el jaqsy túsinip otyr.
Darhan Muqantegi
