Qazaqstan Prezıdenti Nursultan Nazarbaev IV halyqaralyq «KADEX-2016» qarý-jaraq jáne áskerı-tehnıkalyq múlikter kórmesiniń ashylý rásimine qatysty, - dep habarlaıdy Qamshy.kz Aqordanyń baspasóz qyzmetine silteme jasap.
Memleket basshysy is-shara bastalar aldynda qarý-jaraq, otandyq jáne sheteldik óndirýshilerdiń áskerı tehnıkalary nazarǵa usynylǵan birqatar pavılondardy kórip shyqty.
Qazaqstan Prezıdenti ashylýyna qatysqan kórme barysynda TMD-daǵy birden-bir taýly-eger polkiniń, QR Qarýly Kúshteriniń 36-shy desant-shabýyl brıgadasynyń áskerı qyzmetshileri, kaskaderler toby men urys kórinisterin qoıatyn mektep oqýshylary óz sheberlikterin kórsetti.
Nursultan Nazarbaev buqaralyq aqparat quraldaryna arnalǵan brıfıń barysynda táýelsizdik jyldary memleket óz Qarýly kúshterin damytý baǵytynda aýqymdy jumys atqarǵanyn, qazaqstandyq áskerı qyzmetshilerdi Qorǵanys mınıstrliginiń oqý oryndarynda oqytýǵa zor kóńil bólinip otyrǵanyn atap ótti.
Sonymen qatar, Memleket basshysy Qazaqstan armıasyn materıaldyq turǵydan jabdyqtaý júıesin budan ári damyta túsýdiń mańyzdylyǵyna toqtaldy.
«Negizinen, biz ózimizde bar jáne keńestik áskerı-ónerkásiptik keshenmen baılanysty áskerı tehnıkany qoldanamyz. Sonymen birge, ózge eldermen yqpaldastyqtyń, atap aıtqanda, UQSHU aıasyndaǵy tehnıkalyq yntymaqtastyqtyń keshendi sharalary júzege asyrylyp jatyr. Reseı Federasıasymen qarý-jaraq shyǵarý jáne keıbir kásiporyndardy Qazaqstanǵa kóshirý úshin birlesip jumys júrgizý jóninde kelisim bar. Eýropanyń kóptegen elderimen de ýaǵdalastyqqa qol jetkizilgen. Biz Qazaqstanda eń táýir qural-jabdyqtardy qoldana otyryp, ózimizdiń qorǵanys-ónerkásiptik keshenimizdi damytýdamyz. Bir jaǵynan, bul aıtarlyqtaı shyǵyn ákeledi. Ekinshi jaǵynan, áskerı ónerkásip eldi ındýstrıalandyrýdyń ishki jalpy ónim ósimine úles qosatyn bir salasy bolyp sanalady. Jalpy, bul kórme bizge álemniń eń zamanaýı qarý-jaraqtaryn kórýge múmkindik týdyrady. Bizdiń áskerılerimiz úshin, jalpy Qazaqstan úshin bu is-sharanyń mańyzy zor dep oılaımyn», - dedi Elbasy.
Kórmeniń jalpy aýdany 90 myń sharshy metrden astam aýmaqty alyp jatyr. Oǵan 350-deı qazaqstandyq jáne sheteldik kompanıa, 40-tan astam el, 3,5 myń adam qatysyp, 50 myń adam kelip kóretin bolady.
«KADEX-2016» kórmesi mynadaı 7 taqyryptyq baǵytta ótkizilýde: avıasıa tehnıkasy, ushqyshsyz basqarylatyn ushý apparattary men ǵaryshtyq tehnologıalar; Qurlyq áskeriniń jáne Áskerı-teńiz kúshteriniń qarý-jaraǵy men áskerı tehnıkasy; Áýe qorǵanys kúshteri júıeleri men quraldary; áskerdi tyldyq jáne tehnıkalyq turǵydan qamtamasyz etý múlikteri; IT-tehnologıalar, baılanys júıeleri men quraldary; áskerı saladaǵy robotty tehnıka; áskerı salada qoldanylýy yqtımal energıanyń balamaly kózderi.
