Qaraǵandyda UBT-dan bosatylǵan mektep túlegi jumbaq jaǵdaıda kóz jumdy, - dep habarlaıdy Qamshy.kz 31-arnaǵa silteme jasap.
Telearnanyń habarlaýynsha, mektep bitirýshi túski astan keıin qaıtys bolǵan. Ulttyq biryńǵaı testileýden bosatylǵan on jeti jastaǵy Rýslan Aımuhambetovtyń ólimi jaqyndaryna jumbaq bolyp otyr. Óıtkeni, týystary jetkinshektiń eshqashan aýyryp kórmegenin aıtady. Al polısıa qyzmetkerleri qajetti saraptama taǵaıyndaǵanyn aıtady.
Oqıǵa osydan eki kún buryn Rýslan Aımuhambetovtyń synyptasynyń úıinde bolypty. Ulttyq biryńǵaı testileýden bosatylǵan úsh jetkinshektiń bireýi emtıhanǵa daıyndalyp, túski asty da birge ishtik deıdi. Qasynda bolǵandardyń sózinshe, 17 jastaǵy Rýslan qytaı lapshasymen aýqattanǵannan keıin ózin jaman sezine bastaǵan. Kenetten jerge qulap túsken túlektiń aýyzynan kóbik aǵyp, qol-aıaqtary dirildeı bastady,- deıdi sol kezde qasynda bolǵan Erhan Mustafaev.
ERHAN MUSTAFAEV, Rýslannyń synyptasy:
- Massaj jasadyq neshe túrli aıaqtarynan uryp. Neshe túrli qolymyzdan baryn, betinen sý quıdyq. Sosyn ol kezde ýje skoryıǵa zvondadyq.
Biraq qaladaǵy №57 mektep lıseıin bir apta buryn ǵana támamdaǵan Rýslan Aımuhambetovty jıyrma bes mınýttan soń jetken aq halattylar da aman alyp qala almaǵan. Júrek-ókpe reanımasıasyn jasaǵan qyzmetkerler jedel járdemge qońyraýdyń kesh túskenin aıtyp otyr.
AIJAN ISA, Qaraǵandy oblystyq densaýlyq saqtaý basqarmasynyń baspasóz hatshysy:
- Biraq ókinishke oraı, bizdiń dárigerler kelgende zardap shegýshi ómirden ótip ketken. Biraq oǵan qaramastan dárigerler bárin jasaǵan.
Al qara jamylǵan otbasy Rýslannyń densaýlyǵy syr berip kórmegen edi deıdi. Qaıǵyly jaǵdaıdan qabyrǵalary qaıysqan jaqyndary Medısınalyq Ýnıversıtetke túsýdi armandaıtyn Rýslannyń jaqynda Reseıde jobasyn qorǵap kelgenin aıtady.
BAQTYBAI AIMUHAMBETOV, Rýslannyń aǵasy:
- Eshqaı jeri aýyrmaǵan. Óte bir pysyq-tyn. Úıdi ózi bárin jınap.
Túlektiń jumbaq ólimine qatysty arnaıy saraptama júrgiziledi. Qorytyndysy shyqpaı, jetkenshektiń neden qaıtys bolǵanyn ishki ister departamentindegiler de aıta almaı otyr. Al úıdiń ortanshy uly Rýslan Aıtmuhambetovtiń denesi jer qoınyna búgin tańerteń tapsyrylypty.
