Búgin Almatyǵa issaparmen kelgen «Nur Otan» partıasy tóraǵasynyń birinshi orynbasary Muhtar Qul-Muhammed partıalastaryna jer reformasyn túsindirý jumystaryn jandandyrýdy tapsyrdy, - dep habarlaıdy Qamshy.kz QazAqparatqa silteme jasap.
Osy sapar barysynda ol partıanyń Almaty qalalyq fılıalynda bolyp, partıa qyzmetkerleriniń memlekettik baǵdarlamalardy júzege asyrý, saılaýaldy naýqany jáne basqa da máseleler boıynsha atqarǵan jumystaryna baǵa berdi.
«Saılaý aldy naýqanynyń qorytyndysyn júzege asyrý maqsatynda bıyl biz tuńǵysh ret partıa tálimgerleri ınstıtýtyn engizemiz. Ol 8 tálimgerden quralady», - dedi M. Qul-Muhammed.
Sonymen qatar, ol jer kodeksiniń erekshelikterin turǵyndarǵa túsindirýde jiberilgen kemshilikterge toqtaldy.
«Elbasy moratorıı jarıalady, osylaısha bizge jer reformasyna qatysty barlyq pýnktterdi túsindirýge múmkindik berdi.
Al olardy jan-jaqty túsindirý qajet edi. Óıtkeni, Almaty - jastardyń qalasy. Biraq, ókinishke qaraı, bul jumys Almatydaǵy partıa uıymdarynda nashar atqaryldy. Eger túsindirý jumystary stýdenttermen der kezinde júrgizilgende bizdiń 400 myń jaqtasymyz bolar edi. Óıtkeni, Almatyda osynsha stýdent bar. Al osy kezde jan-jaqqa tarap jatqan olar, ózderiniń týǵan jerlerinde túsindirý jumystaryn júrgizer edi.
Endi spıker-sarapshylardyń qyzmetin jandandyrý qajet. Men bilemin, sizderde arnaıy klýb ashylǵan. Olar aqparattyq-túsindirý jumystaryn júrgizedi. Halyqty keńinen qamtý úshin endi qoǵamdyq keńesti de osy jumysqa tartý kerek bolady», - dedi partıa tóraǵasynyń birinshi orynbasary.
Sondaı-aq, ol bul jumysqa tanymal blogerlerdi, jastardyń úkimettik emes uıymdaryn tartýǵa shaqyrdy.
«Turǵyndardy turǵyn úı máselesi, komýnaldyq sharýashylyq qyzmetteriniń jumysy mazalaıdy. Bul máseleler sheshilýi tıis. Almaty qalasy boıynsha turǵyn úı-kommýnaldyq jelilerdi jańartýǵa 9,2 mlrd. teńge bólingen. Ázirge bul somanyń 20 paıyzy ǵana ıgerilipti. Bizdiń mindet: qarjynyń jumsalaýyn jáne jobalardyń júzege asyrylýyn qadaǵalaý», - dedi ol.
Sondaı-aq, kezdesý barysynda Almatyda «nurotandyqtardyń» sanyn 100 myń adamǵa jetkizý kerektigi boıynsha tıisti tapsyrmalar berildi.
Aıta ketelik, osy kezdesýden keıin M. Qul-Muhammed «Aqsaı» nan-toqash kombınaty JSHS jáne Qazaq ulttyq agrarlyq ýnıversıtetinde bolyp, atalmysh mekemelerdiń qyzmetimen tanysty.
