Almatyda tergeý abaqtysynyń qyzmetkerleri qazir jazasyn ótep jatqan áıeldi zorlady dep aıyptalýda! 32 jastaǵy Natalá Slekıshına 155/18 mekemesinde jatqanda 4 azamattyń jynystyq qatynasqa májbúrlegenin aıtady, - dep habarlaıdy Qamshy.kz KTK arnasyna silteme jasap.
Ol tipti sol kezde júkti bolyp qalǵan. Biraq jaqynda ǵana týylǵan balanyń ákesi kim ekeni belgisiz. Al qylmystyq atqarý júıesiniń qyzmetkerleri taǵylǵan aıypty moıyndamaı otyr.
32 jastaǵy Natalá Slekıshına tergeý qapasynda talaı qorlyq kórgenin aıtady. Ótken jyldyń tamyzynda sondaǵy 4 qyzmetker ony zorlap ketken kórinedi. Sodan keıin ol júkti bolyp, jýyrda ǵana qyz balany dúnıege ákelgen. Biraq Názıra degen at qoıylǵan náresteniń ákesi tórteýdiń qaısysy ekeni belgisiz.
Natalá Slekıshına, jábirlenýshi:
– Olar tórteý boldy. Sondyqtan balanyń ákesi kim ekenin bilmeımiz. Qazir DNK-nyń nátıjesin kútip otyrmyz. Jedel ýákil, rejım bastyǵy, kúzetshi jáne starshına qosylyp zorlady.
Balanyń ákesin anyqtaıtyn saraptama Natalányń ózi shaǵym túsirgennen keıin taǵaıyndalǵan. Tek 10 aı boıy nátıjeni kútip sharshapty. Túrme qyzmetkerlerine qatysty qylmystyq is te qozǵalǵan eken. Biraq, jábir kórgen áıel istiń de shala júrgizilip jatqanyn aıtyp otyr.
Natalá Slekıshına, jábirlenýshi:
– Mine, 10 aı ótti. Eshqandaı qozǵalys baıqalmaıdy. Shaǵym jazbaǵan jerim joq. Tek qylmystyq istiń qozǵalǵany týraly jazylǵan qaǵaz alamyn. Qazir bas prokýratýraǵa jazyp jatyrmyn.
Natalányń ózi alaıaqtyq úshin sottalǵan. Qazir Almaty oblysyndaǵy Jaýǵashty túrmesinde. Onyń osynda týylǵan Názıradan bólek 2 balasy bar eken. Olar jańa baýyrlary barynan beıhabar. Áıel zorlyqshylar jazaǵa tartylsa dep otyr. Alaıda tergeý abaqtysynyń basshylyǵy da, atalǵan tórt qyzmetker de taǵylǵan aıypty moıyndaǵan joq.
Sergeı Kýrılov, LA-155/18 mekemesi bastyǵynyń tárbıe jumysy jónindegi orynbasary:
-Áıeldiń ózi tergeýge, sot otyrystaryna baryp-kelip júrdi. Onyń sol jaqtarda júkti bolyp qalýy da múmkin. Bárin tergeý kórsetedi. Degenmen, qyzmetkerlerimizdiń mundaı áreketke barmaıtynyna senimdimin.
Káni taǵylyp otyrǵan 4 azamat ta osy mekemede uzaq ýaqyttan beri qyzmet etip keledi. Báriniń jasy 35-ten asqan. Bala-shaǵalary da bar.
Qazir aıyptalǵan 4 qyzmetker de jumys ornyna emin-erkin kelip júr. Al, túrmede otyrǵan áıeldi zorlaǵandary dáleldense, qyzmetten qýylyp qana qoımaı, tıisti jazaǵa tartylatyn bolady. Biraq, bul Natalá Slekıshınanyń jazasyn jeńildetýge kómektespek emes. Iaǵnı, ol qandaı jaǵdaıda da tıisti 8 jyl merzimin ótep shyǵýǵa mindetti.
