Qazaqstandyq rejıser Ermek Tursynov qazaq estradasyndaǵy tanymal ánshiler Zattybek Kópbosynuly men Qaırat Nurtastyń tyńdarmandaryn maımylǵa teńedi, - dep habarlaıdy Qamshy.kz newtimes.kz-ke silteme jasap.
Ózin qazaq tarıhy men mádenıetinen jaqsy habardar, ult rýhanıatyna zor úles qosyp júrgen óner qaıratkeri sanaıtyn Ermek Tursynov sońǵy ýaqytta saıası, qoǵamdyq máseleler týraly da keıbir basylymdar betinde jıi qalam terbeıtin bolyp júr. Alaıda, ol maqalalaryndaǵy oılary da «Kelin» fılmi sıaqty qoǵamnyń qarsylyǵyna tap bolýda. Tanymal rejıser jaqyndaǵy bir suhbatynda elimizdegi kıno óndirisi týraly aıta kelip:
«Ana jaqta Zattybek, Qaırat Nurtas án aıtyp turady, zalda maımyldar toly, óz qudaılaryn tapqan. Boldy. Munyń bári ótken. Mundaılardy dısneı túsirip tastaǵan. Aqyldy adamdar baıaǵyda túsirip tastaǵan tamasha múltfılmder bolǵan. Men teledıdardy sırek kóremin. Shamasy Jańa jyl kúni-aý deımin. Barlyǵy demalyp jatty. Teledıdardy qossam Qaırat Nurtastyń benefısi 3 saǵatqa sozyldy, artynan Zattybek ketti. Barlyq arnalarda basqa jigitterdi kórsetip jatty. Bul negizi katastrofa», - dep bir-aq qaıyrypty. Rejıserdiń oıynsha álgi ánshilerdi tyńdaýshylardyń talǵamy tómen kórinedi.
Qoǵamdaǵy teris qubylystarǵa ózindik pikirin aıtyp, qajet jerde bılik pen qoǵamnyń kem-ketik tustaryn ashyq aıtyp júretin rejıser sońǵy ýaqytta adasaıyn dedi. Kóp jerde janama túrde bılikti aqtap, qoǵamdaǵy qıyndyqtar men sátsizdikterdiń barlyǵyna halyqty kináli etip kórsetetin bolyp júr. Ermektiń «Prezıdenti qandaı bolsa halqy sondaı emes, halqy qandaı bolsa – Prezıdenti de sondaı» degen sıaqty oı oramdary sonyń aıǵaǵy. Rejıserdiń oıynsha, qazir halyq toıynǵan, toıǵandyqty kótere almaı, kertartpalyqqa salynyp jatqan kórinedi. «Semizdikti qoı ǵana kóteredi. Biz soǵystan óttik, ashtyqtan óttik. Biraq, aman qaldyq. Biraq, biz semizdikti kótere almaýdamyz. Sondyqtan kóshelerimizde daraqylyq kóp, elder kóligimen kó.nen keıin qaraı júredi, kólikter jaıaý júrginshilerdi basyp kete beredi, úsenovshına órship tur» degen E. Tursynov bar kináni halyqtyń ózine artý degen tamasha pozısıa taýyp alǵan sıaqty. Bir qaraǵanda ótkir syn aıtyp jatqan sıaqty kórinedi. Alaıda, ol syn tıisti jerlerge, tıisti tulǵalarǵa emes, qarapaıym halyqtyń, sol úsenovshına, jemqorlyq pen álimjettiktiń qurbany bolyp otyrǵan buqaranyń ózine baǵyttalýda. Osyǵan qarap, birneshe fılm túsirip, aty biraz jerge tanylǵan rejıserimizdiń ózi «semizdikti kótere almaı» júrgen joq pa degen suraq týady. Qaırat Nurtasty tyńdaıtyn - qazaq, Zattybektiń de senetini - qazaq. Al, olar maımyl, banderlogalar bolsa, Ermek Tursynovtyń ózi kim?
Darhan Muqantegi
