Elimizdiń Ulttyq olımpıadalyq komıteti qazaqstandyq sportshylardan alynǵan dopıng synamalardyń qaıta tekserilgenin rastady, - dep habarlaıdy Qamshy.kz 24.kz-ke silteme jasap.
Sala mamandarynyń habarlaýynsha, Beıjiń men London olımpıadalaryna qatysqan birneshe sportshy ruqsat etilmegen preparat qoldandy degen kúdik týdyryp otyr. Solardyń ishinde qazaqstandyq oǵlandar da bar. Sondyqtan Halyqaralyq olımpıadalyq komıtet synamalardy Shveısarıanyń Lozanna qalasyndaǵy arnaıy zerthanada qaıta tekserip jatyr. Aıta keteıik, búgin birqatar qazaqstandyq jáne sheteldik buqaralyq aqparat quraldary aýyr atletıkadan Olımpıada chempıondary Ilá Ilın men Zúlfıa Chınshanlo altyn medalderinen aıyrylady degen málimet jarıalady. Buǵan qosa olardyń bıylǵy Rıo jarysyna qatysa almaıtynyn da jarysa jazyp jatyr. Alaıda osy máselege qatysty áli resmı málimdeme jasalǵan joq. Al Ulttyq olımpıadalyq komıtet qaıta tekserý nátıjesi belgili bolǵannan soń tıisti túsinikteme beretin boldy.
