Keshe Úkimet janyndaǵy Jer reformasy jónindegi komısıanyń músheleri Aıdos Sarym, Dos Kóshim men Muhtar Taıjan Almaty qalasy turǵyndarymen kezdesti, - dep habarlaıdy Qamshy.kz.

Jınalǵandarǵa komısıa músheleri keńestiń jumys barysy, ondaǵy negizgi máseleler qandaı deńgeıde talqylanatyny men komısıa jumysynan qandaı nátıje kútiletinin ortaǵa saldy.

Kezdesýge kelgen belsendiler men jýrnalıser komısıa múshelerine onyń jumysy týraly suraqtar qoıýmen shektelmeı naqty usynystarymen de bólisti.

Álıhan Qanapá esimdi kásipker óziniń agrarlyq salada, onyń ishinde sheteldik kompanıalarmen áriptestik ornata jumys isteý tájirıbesi baryn alǵa tarta otyryp, Qytaı ınvestısıasyna qyzyǵýshylyq el úshin ekologıalyq úlken apat ákelýi múmkin ekenin aıtady.

«Jer kodeksi sońǵy ózgeristerimen qolodanysqa ótpeýi kerek. Oǵan birneshe sebep bar. Mysaly, Qytaı eli ekonomıkada nashar menedjer. Olar jer asty sýlarynyń 90 paıyzyn, jer betindegi sýdyń 70 paıyzyn, al, aýasynyń 50 paıyzyn lastap otyr búginde. Bul olardyń óz elderinde istegenderi. Al, uzaq merzimge jalǵa alynǵan basqa eldiń jerin qaıtetinin ózińiz baǵamdaı berińiz», - deıdi ol.

Kásipker shetel ınvestısıasyn tartyp, oǵan ótemaqy retinde jerdi arendaǵa bergennen góri, otandyq fermerlerdi qoldaýdyń basqa da joldary baryna senimdi.

«Ulttyq qordan tek 1 mıllıard dollar bólip, fermerlerge tegin tehnıka taratsaq, ol tehnıkany alǵan fermerdiń birneshe jylǵa deıin satýyna tyıym salatyn mehanızm engizsek, bul aýylǵa shyn qoldaý bolar edi. Bizde tehnıkaǵa muqtaj bolyp otyrǵan kisiler kóp. Olar ol tehnıkany qýana alady. Al, qazirgi sýbsıdıa, basqa da júıelerdiń tıimdiligin kórip otyrǵan joqpyz», - deıdi ol.

Komısıa múshelerinen komısıadaǵy  jer satýǵa qarsy ustanymdaǵy azamattardyń ózara kelispeıtin tustary men máseleler týraly da suraldy.

«Ár adam óziniń pikirin bildirýge quqyly. Ony eskerý de kerek. Biraq, komısıadaǵy osy úsheýmiz (M. Taıjan, D. Kóshim. A. Sarym – red.) jerdi shetelge jalǵa berýge, satýǵa, Qazaqstan azamattaryna jeke menshikke satýǵa qarsymyz», - dep jaýap berdi ol suraqqa komısıa múshesi M. Taıjan.

Jıyn barysynda komısıa músheleri qazirgi kúnniń ózinde latıfýndıserge shekteý qoıý, jer kadastry men onyń elektrondy bazasyn jasaý, fermerlerdi qoldaý tetikteri týraly birneshe usynystyń pisip, jetilgenin jetkizdi.

Kezdesýge kelgender komısıa múshelerinen jerdi jeke menshikke satýǵa, shetelge arendaǵa berýge aıaǵyna deıin qarsy bolýdy surap, ózderiniń ótinish-tilekterin qaǵazǵa túsirip, tapsyryp berdi.