«Eı, ıman etkender! Kúnalardan saqtanyp, taqýalyqqa jetýleriń úshin senderge burynǵylarǵa paryz etilgendeı oraza paryz etildi».
(«Baqara» súresi, 185 aıat)
Asa Meıirimdi, rahymdy Allanyń atymen bastaımyn! Barlyq maqtaýlar Allaǵa tán. Paıǵambarymyz Muhammedke, onyń otbasyna, sahabalaryna sansyz salaýattar bolsyn!
Mine, aılardyń ulyǵy, aılardyń sultany, kúlli musylman balasy úshin qasıetti Ramazantabaldyryǵymyzǵa taqap tur. Alla qalasa qasıetti aımen qaýyshatyn kún de keler. Alla taǵala tórt kózimiz túgel sol qasıetti aımen aman qaýyshýdy jazǵaı!
Alla taǵala adam balasyn qasıetti Quranda «ınsan» degen atpen ataǵan. Bul sózdiń qazaqsha maǵynasy umytýshy degendi bildiredi. Endeshe, bizder adamdar umytýshymyz. Aqylymyz da shekteýli. Sol sebepti de, bir-birimizdiń esimizge salyp otyrý musylmandyq mindetimiz. Sol musylmandyq mindetimizdiń bir paraǵy bolsyn deposy oraza haqynda qalam terbegen jaıymyz bar. Endi áńgimemizdi árlep, ármen qaraı sózimizdi sabaqtaıyq.
Ardaqty aǵaıyn,«beınettiń de zeıneti bar» dep atam qazaq aıt qandaı, Alla jolynda tógilgen ter, kórgen beınet aqtalady. Al, dúnıe úshin qaırat jumsaý mańdaıyńyzdan shyqqan bir tamshy terge tatymaıdy. Búgin bar da erteń joq.Dúnıe — aldamshy nárse. Sol úshin babalarymyz «dúnıe jalǵan» dep tamasha támsil qaldyrǵan. Allanyń razylyǵy úshin jasaǵan jaqsy amaldaryńyzben qulshylyǵyńyzdyń qaıtarymy sizdiń enshińizden eshqaıda ketpeıdi. İstegen izgi isińiz, ózińizden basqa eshkim alalmaıtyn bankomattaǵy jeke shotyńyzǵa salǵan aqshańyz sıaqty. Sizden basqa eshkimniń enshisine buıyrmaıtyn saýapty amalyńyz aqyrettegi azyǵyńyz bolyp qala bermek. Alla taǵala pendeleriniń istegen izgi isteriniń qarymtasyn on eselep qaıtaratyny jaıly qasıetti Quranda bylaı dep ýáde berdi. «Kim jaqsy amalmen kelse, oǵan sondaıdyń ony /eselenip/ beriledi...». («Ál-Ánǵam» súresi, 160-aıat).
Al, Jaratqanǵa jaǵymdy, jaqsy isti Ramazan aıynda jasap jatsaq saýaptyń tipti san eselenetini sózsiz.
Sebebi, bul aı — meıirim aıy. Bul aı — istegen árbir jaqsylyǵymyz bizdi Jánnatqa jeteleıtin aılardyń sultany.
Alla — uly. Alla — sheksiz qudyretti. Alla — sheksiz meıirimdi. Allanyń ádildigin aıtyp tilimiz tipten jetpesi anyq. Al, sonshalyqty ádil bolǵan ulyq Alla Ózi bergen ýádesin buzbaıtyny bárimizge belgili. Endeshe, Allanyń uly ýádesiniń biri — osy Ramazan aıy. Alla taǵala qasıetti Qurandy osy Ramazan aıynda túsirdi jáne sol qasıetti Quran túsken qadyr túnin moınyn ıgen musylmanǵa myń aıdan da qaıyrly etip qoıdy.
«Negizinen Qurandy qadyr túninde túsirdik. Qadyr túniniń ne ekenin bilesiń be? Qadyr túni myń aıdan da qaıyrly». («Qadyr» súresi, 1-2-3-aıattar).
Oılańyzshy!!!
Bunan basym túser basqa baqyt barma?!
— Álbette, joq.
Árbir pende úshin Allanyń saýabyn alýdan asqan baqyt bolýy múmkin emes. Sondaı súbeli saýapty súzip alar mol múmkindikti qushaǵyna qysqan Ramazan aıyn aılardyń sultany demeı ne dersiz!
Allanyń aq jolynan aınymaıtyn, peıili keń pendesi úshin sheksiz saýapy shelektep bergen Meıirimdi Allanyń meıirimin aıtyp jetkizýge siráda sózimiz jetpes.
Sol bir sóz jetpes Meıirimdi Allanyń meıirimin musylmandarǵa syılaǵan Ramazan aıynyń qasıeti jóninde Ibn Abbas (r.a) keltirgen bir hadıste Paıǵambarymyz (s.ǵ.s): «Egerde meniń úmmetim Ramazan aıynyń ishinde qandaı qasıetter bar ekendigin bilse ǵoı, onda, jyldyń barlyǵy ramazan aıy bolsa eken dep úmit etken bolar edi», — deıdi.
Qarańyzshy, Ramazan aıynyń qadyry týraly Haqtyń elshisi qalaı aıtty?!
Allanyń aqıqatyn ǵana aıtatyn súıikti Paıǵambarymyz (s.ǵ.s): «...Ramazan aıynyń ishinde qandaı qasıetter bar ekenin bilse ǵoı...», — dep qandaı qasıetterdi aıtyp otyrǵany jaıly dáıekti dálelderdi oqı otyryp, oı elegińizden ótkizip kórińizshi!
Oıymyz oıpańǵa túsip ketpes úshin jáne bir hadıske júginelik. Taǵy bir tamasha hadıste Allanyń Elshisi (s.ǵ.s) Alla Taǵala: «Aýzy berik adam iship-jeýin men úshin doǵardy. Oraza – Meni men qulymnyń arasyndaǵy ǵıbadat. Oǵan beriletin syıdy Men ǵana ólshep, Men ǵana beremin. Aýzy berik qulymnyń ashtyq pen shólden aýyzynanshyqqan ısi men úshin mısk átirinen de tamasha», — deıdi.
Minekı, bul hudsı hadıste Alla taǵala: «...oraza – Meni men qulymnyń arasyndaǵy ǵıbadat. Oǵan beriletin syıdy Men ǵana ólshep, Men ǵana beremin...», —deıdi. Basqa eshbir qulshylyq amaldaryna mundaı ýáde bermegen Alla osy orazanyń saýabyn Ózim beremin dep turǵan joq pa?! Tipti, «...aýzynan shyqqan ısi men úshin mısk átirinen de tamasha», — deıdi. Myń aıdan da qaıyrly qadyr túnin osy oraza ustaýshy quldary úshin qıǵan uly Jaratýshynyń jomarttyǵy da Ramazan aıynyń enshisinde eken. Olaı bolsa osy Ramazan aıynyń ishinde qandaı qasıettiń baryn baǵamdaı berińiz.
Paı-paı, shirkin!
Qandaı keremet!!!
Myna bir keremet hadıske de den qoıyp qarańyzshy!
Imam Tobaranı jáne ımam Ibn Nájjár rıýaıat etken bul hadıste Býba ıbn Ás-Samıt (r.a) aıtady: «Ramazan taıap qalǵan bolatyn. Rasýlýllah (s.ǵ.s) bir kúni: «Bereke aıy bolǵan Ramazan jaqyndap qaldy. Bul aıda Haq taǵala senderge nazaryn salady. Ári rahmetin túsirip, kúnálardy keshirip, duǵalardy qabyl etedi. Alla taǵala senderdiń ıgilik isteýge jarysqandaryńdy kórip, ony perishteleriniń aldynda maqtanysh etedi. Ondaı bolsa, Haq taǵalaǵa jaqsy amaldaryńdy kórsetińder! Tipti, osy aıdyń ózinde Alla taǵalanyń rahmetinen maqurym qalǵan pende aqıqatynda baqytsyz»,— dedi».
Qasıetti Ramazan aıynda Alla taǵala pendelerine nazaryn salyp, rahymetin túsirip, kúnálaryn keshirip, duǵalardy qabyl etse, bizge endi onan basqa ne kerek?! Alla taǵala tipti, ıgilik isteýge jarysqandaryńdy kórip, perishtelerine maqtan etedi dep turǵan joqpa!
Osy jerde sál de bolsa oılanaıyqshy!
Eger, Alla taǵala pendesin jaqsy kórmese, pendesiniń istegen bolmashy izgi isin perishteler aldynda maqtan eterme edi?! Bul Allanyń pendesine degen peıiliniń, naǵyz meıirimniń keremet kórinisi emespe?!
Asa Meıirimdi Allanyń rahmetinen alys qalǵan adam, shyndyǵynda shynaıy baqytsyzdyqtyń bulty basyna tóngen beıbaq bolmaq. Al, bul dúnıedegiQudaıǵa qylǵan qulshylyǵyńyz, qıamette qyl kópirden qınalmaı ótýińizdiń kepili edi. Osy kepil bolar keremet múmkindikti Meıirimdi Alla Ramazan aıynyń enshisine jazyp qoıypty. Basqa aılarda jasaǵan qulshylyqtan saýabyn san ese artyq etip Ramazandaı uly qulshylyq aıyn bergen Meıirimdi Allanyń meıirimine bólený baqyty buıyryp turǵan osy oraıly sátti ońtaıly paıdalanyp qalýǵa barymyzdy salaıyq baýyrlar! Álbette, onbir aı boıy qampaıyp júrgen qarnyńyz, orazanyń alǵashqy on kúnidesizdi biraz silkip alar. Alaıda, kúnniń aptabynda ashtyqqa shydap baqsańyz, meıirimge toly onkúndikte meıirimińizdi meılinshe arttyrsańyz, aldyńyzda kútip turǵan ortańǵy on kúndikte kúnáńizdiń tógilerine tamasha taǵan qalaǵanyńyz. Al, kúnálaryńyz sary kúzde sarǵaıǵan japyraqty taldy silkigendeı tógilse, tozaq otynan qutylýǵa qam qylatyn orazanyń sońǵy on kúndiginde sizdiń qorjynyńyz qampaıaryna kúmánińiz bolmasyn. Óıtkeni, bular Allanyń ýádesi. Tek, nıetińiz týra, amalyńyz tolyq bolǵaı!
Paıǵambarymyz (s.ǵ.s)bir hadısinde: «Ramazan aıynyń alǵashqy on kúni — meıirim, ortasy — kúnádan arylý, sońy — tozaq otynan qutylý», — degen.
Olaı bolsa baýyrlar, sansyz saýaptan salymsyz qalmaýǵa qamdanaıyq! Saýaptyń syıysulýlyǵyna sóz jetpes jumaqtyń saraıybolmaq. Meıirimdi Allanyń meıirinen aıyrylyp, Jaratqan Iem ózi ýáde etken Jánnattyń saraıynan qur qalý, ókinishke oraı shynaıy baqytsyzdyq. Alla taǵalam aqyrettegi baqytsyzdyqty basymyzǵa bermesin!
Aqyrettik azyǵymyzdy aıamaı úıip bergen berekeli Ramazan aıyndaǵy súbeli saýapty súzip alýǵa saqadaı saılanyp, qambamyzdy «qazynaǵa» toltyraıyq, qadirmendi qalaıyq!
Alla taǵala elimizge, jerimizge amandyq, tynyshtyq syılap, berekesi buzylmaǵan otanymyzdabeıbitshiliktiń besigi terbele bergeı! Ámın!!!
Nurjan qajy Talasuly
Almaty qalasy, «Taýgúl-3» meshitiniń bas ımamy
