Qasıetti Ramazan aıyna sanaýly ǵana saǵattar qalǵan sátte Aqtóbedegi qandy oqıǵa kúlli qazaq jurtynyń jaǵasyn ustatty, dep jazady muftyat.kz.
Alla taǵalanyń rahymyna ıe bolyp, sansyz saýapqa keneletin berekeli aıdyń berekesin qashyrǵan qandyqol qaraqshylardyń qylyǵy adamgershilikten alystap, musylmandyǵyńa pysqyrmaıtyndardyń tirligi ekenin aıǵaqtaıdy. Beıbit kúnde qolyna qarý alyp, qan tókken qanypezerlerdiń áreketi halyq arasynda qyzý talqylaný ústinde.
Jaıbaraqat kúnde jaı túsirgendeı áser etken oqıǵaǵa baılanysty QMDB-nyń tóraǵasy, Bas múftı Erjan qajy Malǵajyuly búgin Astana qalasyndaǵy «Áziret Sultan» meshitinde ótken taraýıh namazy aldynda óz pikirin bildirdi. Shynaıy musylmannyń ózgege qoly túgili, tilimen zıan tartqyzbaıtynyn aıtyp ótken Bas múftı naqaqtan qaza tapqan jandardyń otbasyna kóńil aıtyp, sabyrlyq tiledi. Osynaý qasıetti aıda elimiz ben jerimizdiń tynyshtyǵynan aıyryp, dúrbeleń týǵyzýdy kózdegen jat pıǵyldardan saqtaýyn surap duǵa etýge shaqyrdy.
