Ústine zár shashylǵan jezqazǵandyq eks-polıseı Tólegen Igibekov búgin, 7 maýsymda bostandyqqa shyǵady, - dep habarlaıdy Qamshy.kz Tengrinews.kz – ke silteme jasap.
Mundaı sheshimdi sýdıa Álimbekov shyǵardy. Ol bes jylǵa bas bostandyǵynan aıyrylǵan eks-polıseıdiń merzimin shartty jazaǵa aýystyrdy.
Apelásıalyq proseste memlekettik aıyptaýshy Tólegen Igibekovtyń jazasyn shartty túrdegi jazaǵa aýystyrýdy surady. Alaıda sýdıa sottalýshynyń tipti keshirim suramaǵanyn atap ótti. "Igibekov nege áli kúnge keshirim suramaǵan? Al suhbatynda osyndaı jaǵdaı taǵy bolsa taǵy shapalaqpen uratynyn aıtady. Onyń sózin qalaı baǵalaýǵa bolady? Ol ókinbedi me? Osyǵan baılanysty onyń jazasyn jeńildetýge bola ma?", - dep surady sýdıa prokýrordan.
Eks-polıseıdiń advokaty Igibekovtiń áreketinde qylmys quramynyń bolmaǵanyn aıtty.
"Igibekov qylmys jasaǵan sátte afekt jaǵdaıynda boldy. Onyń áreketinde qylmys quramy bolmady. Igibekov qarapaıym serjant, sportshy, ony búkil Jezqazǵan biledi. Onyń sózderin durys túsinýlerińizdi suraımyn, ol bostandyqtan aıyrý oryndarynda bolmaýy kerek", - dedi advokat Mýsın.
"Quqyq qorǵaý organdarynyń ókiliniń tarapynan kúsh kórsetýge jol berýge bolmaıdy. Polısıa qyzmetkerleriniń qorlaýǵa, namysyn taptaýǵa nemese zorlyq kórsetýge quqy joq. Igibekovtiń suhbatynda osy jaǵdaı ekinshi márte bolsa dál osylaı áreket etetin edim degen sózi maǵan túsinikti", - dedi sýdıa.
Aıta keteıik, proseste Igibekovtiń ózi joq. Al jábirlenýshi Qaırat Elýbaev qarsylyq kórsetpegenin jáne polıseıge zár shashpaǵanyn aıtty. "(...) Bıologıalq saraptama jasaýǵa daıynmyn. Olar kólikti toqtatqannan vıdeoǵa túsirgenim úshin birden qolymdy qaıyra bastady. Men antıkorrýpsıalyq qyzmetke habarlastym, sebebi polısıadaǵylar maǵan kómektespeıtin edi. Igibekovke qatysty ókpem joq. Úkimdi óz qalaýyńyzben shyǵarýyńyzdy suraımyn", - dedi ol.
Sóıtse, jábirlenýshiniń ózi burynyraqta anyqtaý organynda jumys istepti. Attestasıadan óte almaǵandyqtan jumystan shyǵyp qalypty. Osy oqıǵalardyń barysynda jeke kásipker bolyp jumys istegen.
Aıta keteıik, proseske Igibekovtyń anasy men týystary keldi. Áıeli Móldir Baısalova proseske kele almady. Sebebi ol bala bosanypty. 28 mamyrda polıseıdiń ekinshi uly dúnıege kelipti.
Sýdıa taraptardy tyńdaǵannan keıin "Jezqazǵan qalalyq sotynyń sheshimin sol merzimge shartty jazaǵa ózgertý jáne probasıalyq baqylaý ornatý" jazasyn qaýly etti. Osylaısha, Igibekov búgin, 7 maýsymda bostandyqqa shyǵady.
"Óte qýanyshtymyn! Onyń áıeli meni onsyz qaıtpaýymdy talap etken. Ol ekinshi ulyn bosandy. Onyń esimin Amangeldi dep qoıdyq. Endi ne isteıtinimizdi sheshemiz. Ázirshe osyǵan qýanyp turmyz", - dedi eks-polıseıdiń anasy Márıa Igibekova.
Sottyń úkimi shyqqannan keıin zaldaǵylar qol shapalaqtap, qýandy.
Apelásıalyq sot alqasynyń tóraǵasy Qaraǵandy oblystyq sotynyń tóraǵasy Musabek Álimbekov boldy.
Eske salaıyq, qalalyq jol-patrýldik polısıasynyń qyzmetkeri mas júrgizýshini shapalaqpen urǵany úshin sottalǵan bolatyn. Júrgizýshi qanynda tabylǵan alkogóldi kórsetken kýálandyrý qorytyndylarymen kelispeı, zárin serjantqa shashyp jibergen. Osy kezde serjant ony shapalaqpen urǵan. Keıin júrgizýshi qamalyp, kepilaqymen bosatylǵan. Osydan keıin 5 jylǵa sottalǵan polıseıdiń áıeli málimdeme jasaǵan bolatyn.
İshki ister mınıstri Qalmuhanbet Qasymov betine zár shashylǵannan keıin júrgizýshini shapalaqpen urǵany úshin bes jylǵa sottalyp ketken jezqazǵandyq polıseıdiń isi boıynsha Joǵarǵy sotqa hat jazǵanyn aıtty.
