Aqtóbe oblysynyń basshylyǵy terrorlyq akti saldarynan qaza tapqan otbasylarǵa materıaldyq kómekti ulǵaıtý týraly sheshim qabyldady, - dep jazady Qamshy.kz QazAqparatqa silteme jasap.

Materıaldyq kómek 4 otbasyǵa burynǵy aıtylǵan 1 mıllıon emes, 5 mln teńgeden kórsetiletin boldy.

Aqtóbede 5 maýsymda eki qarý-jaraq dúkenine jáne áskerı bólimge qarýly shabýyl jasaldy. İİM derekterine sáıkes sodyrlardyń kóbi ustaldy. Búginde alty adam izdeýde.

Lańkestik saldaryna 7 adam qaza tapty. Onyń ishinde azamattar men áskerı tulǵalar bar. Memleket basshysynyń tapsyrmasymen ákimdik qaza tapqan, zardap shekken otbasylarǵa barlyq qajetti kómekti kórsetýde.

Qaza tapqandar  ishinde  -  «Pallada»  dúkeniniń satýshysy 44 jastaǵy Andreı Maksımenko, 69 jastaǵy zeınetker Nıkolaı Onıshenko, 35 jastaǵy Mıhaıl Matrosov kezdeısoq oqqa ushty, 33 jastaǵy «Kúzet» qyzmetkeri Merhan Tájibaev qyzmettik mindetin ótkerý barysynda kóz jumdy.

Qaıǵyly oqıǵaǵa baılanysty Qazaqstanda 9 maýsym qaraly kún dep jarıalandy.

Respýblıka boıynsha jalaý tómen túsirildi. Mádenı-buqaralyq, sport, oıyn-saýyq sharalary toqtatyldy. Kóńil kóteretin tele- jáne radıo habarlar keıinge qaldyryldy.