Ulan Qonysbaev endi kemi úsh aı emdeledi Dalánda ótken Qytaı – Qazaqstan kezdesýi jerlesterimizdiń jeńisinen bólek, Ulan Qonysbaevtyń óte aýyr jaraqatymen jankúıerlerdiń esinde qalatyn boldy. Endi tarazdyq tarlannyń úlken fýtbolǵa qashan, qalaı oralatyny belgisiz. Býtsydy aıaǵyna kıgenniń ózinde jasyl alańda burynǵydaı jarqyldaı ala ma, joq pa, ol jaǵyn da aıta almaımyz. Al biz týra Ulan sıaqty tobyq pen jilinshikten ketken álem aıaqdobyndaǵy taǵy bes fýtbolshynyń jasyl alańdaǵy keıingi taǵdyrlary zerttep kórgen edik, - dep jazady belgili sport sholýshysy Ázız Jumadil sportsffa.kz saıtynda.
Eskertý: beınerolıkterdi júıkesi juqa adamdarǵa kórýge bolmaıdy.
Devıd Bast (Anglıa) – 08.04.1996 j. Óz basym bul beınerolıkti bir-aq ret kórdim. Ekinshi ret qaraýǵa júregim daýalamady. 1996 jyl. «Old Traffordtaǵy» «Manchester Iýnaıted» – «Koventrı Sıtıdiń» ekinshi mınýty ótýde. Qonaqtar buryshtama dobyn oryndaýǵa múmkindik aldy. Shabýylǵa kómektesýge qorǵaýshysy Devıd Bast ta jetip keldi. Kenet, dopqa talas kezinde «MÚ»-diń eki oıynshysy Devıd Irvın men Braıan Makkler qatar sekirip, Basttyń aıaǵyn myjyp tastady. Tobyǵy da, jilinshik súıekteri de synyp, alań qanǵa kómildi. Bári oıyn jaǵdaıynda bolǵandyqtan eshkim alańnan qýylmaǵanymen mach 12 mınýtqa úzildi. Óıtkeni, qandy jýyp ketirý ońaı bolmaǵan edi. Al osynyń barlyǵy kóz aldynda bolǵan «qyzyl soıqandardyń» qaqpashysy Peter Shmeıhel júregi loqsyp, qaıta-qaıta qusa berdi. Artynsha psıhologqa jazylyp, ózine ázer keldi. Devıd Bast she? Aıaǵyna 26 ret ota jasatty. Jasyl alańǵa qaıta umtylǵanymen «aıaǵyńdy kespegenimizge rahmet aıt» degen dárigerler oǵan dop tebýge ruqsat bermeı qoıdy.
Djıbrıl Sısse (Fransıa) – 30.10.2004 jáne 07.06.2006 j.
Fransıalyq aq saqaldy, sary shashty qara jigit fýtboldaǵy karerasynda eki ret aıaǵyn ońdyrmaı syndyrǵan. Birinshisinde «Lıverpýlde» oınap júrgen kezi bolatyn. Chempıonat aıasynda «Blekbernmen» kezdesken. Kenet «qańǵybastardyń» qorǵaýshysy Djeıms Makıvlı art jaqtan qos aıaqpen sekirdi de, Sısseni «oıbaılatyp» jiberdi. «Úlken jáne kishkentaı jilinshik súıekteriniń ashyq synyǵy» degen dıagnoz qoıdy dárigerler. Biraq, Djıbrıl myqty eken, alty aı óter ótpesten «Lıverpýl» sapynda qaıta alańǵa shyǵyp, komandasynyń lıderi boldy.
Alaıda, ekinshi jaraqatynan keıin biz burynǵy Sısseni kóre almadyq. Obalyna Qytaı oıynshysy qaldy. Osydan týra 10 jyl buryn bolatyn. Ulan Qonysbaevtyń aıaǵyn qytaılyqtar 2016 jyldyń 7 maýsymynda syndyrsa, Sısseni 2006 jyldyń osy aıy, osy kúninde omaqasynan túsirdi. «Djıbrıldiń jan aıqaıyn estigende denem túrshigip ketti. Tez saýyǵyp ketýin tileımin! Ol myqty. Mindetti túrde alańǵa qaıta oralady», - dedi sol kezde komandalasy Terrı Anrı. Iá, Sısse qaıta oraldy. Alaıda, burynǵy babyna qaıta kelmedi. Ras, eki ret Grekıa chempıonatynyń úzdik surmergeni atandy. Biraq bul maqtanysh pa?
Franchesko Tottı (Italıa) – 19.02.2006 j Aıaqtan alǵan aýyr jaraqatty jeńgenderdiń biri – Franchesko Tottı. 2006 jyldyń 19 aqpanynda «Empolıge» qarsy oıynda jilinshik súıegin ǵana emes, tobyq súıegin de syndyryp alǵan «Romanyń» «Gladıatory» sol jyly Germanıada ótken álem chempıonatyna qatysyp qana qoımaı, 7 oıynda da alańǵa shyqty. Eń bastysy, bas kýbokty basynan asyra kóterdi. Al onyń aldynda dárigerler ony kemi bir jylǵa qatardan shyqty dep bastaryn ustaǵan. Aıaǵyna metal tiligin salyp, súıektiń ornyn sol temirmen bekitken. Tottı sodan beri azdap aýyrsynsa da, «Romanyń» naǵyz «Imperatory» bolyp qala berdi.
Edýardo da Sılva (Horvatıa) – 23.02.2008 j. Horvatıa azamattyǵyn alǵan brazılıalyq shabýylshynyń ot bolyp lapyldap turǵan kezi edi. Biraq «Bırmıngemmen» bolǵan oıyn onyń fýtboldaǵy karerasyna birjola núkte qoımasa da, biraz áýrege saldy. Tipti, alǵashynda dárigerler aıaǵyn kesýi múmkin degen de sybystar tarady. Áýpirimdep aman qalǵan Edýardo alańǵa bir jyldan keıin bir-aq shyqty. Shyǵa salysymen eki gol soǵyp, «Arsenaldy» alǵa jeteledi. Alaıda jaraqaty shydatpaı, ekinshi taımda almasýǵa májbúr boldy. Keıin Ýkraınanyń «Shahterine» aýysty, Brazılıaǵa baryp qaıtty, qaıta Ýkraınaǵa keldi. Kim biledi, eger sol kezde Martın Teılor saq oınap, aıaǵyn oryp jibermegende qazir Edýardo «Real» nemese «Barselonanyń» birinde oıqastap júrer me edi?!
Aaron Remzı (Ýels) – 27.02.2010 j. Bolashaǵynan mol úmit kúttirgen «arsenaldyq» Rembo 18 jasynda Anglıa Premer-lıgasynyń eń úzdik jas oıynshysy atandy. Bul 2009 jyl edi. Bári de Aaronnyń oıynyn Zınedın Zıdandikine uqsatyp júrdi. «Altyn doptardyń» bolashaq ıegeri retinde tanydy. Degenmen, 2010 jyldyń 27 aqpany onyń ómirin birshama ózgertip jiberdi. «Stok sıtımen» bolǵan kezdesýde Raıan Shoýkrosspen qaqtyǵysyp qalyp, aıaqtan óte aýyr jaraqat aldy. Alańda segiz mınýt em-dom jasaǵan dárigerler aqyry jedel járdemmen jaqyn mańdaǵy aýrýhanalardyń birine alyp ketti. Bas tóreshi kinálini alańnan qýdy.
Jaraqatyn emdeýge 9 aı ketti. 2010 jyldyń 23 qarashasynda «Arsenal» sapynda alańǵa qaıta shyqqanymen «Nottıngem Forest», «Kardıf Sıtı» syndy ekinshi deńgeıli klýbtarǵa jalǵa berildi. 2011 jyly «Arsenal» Aarondy qaıta shaqyrtyp aldy. Biraq birden kósilip ketken joq. Basynda aıaǵyn tartyp oınap júrdi. Búginde Remzı qaıta babynda. Sońǵy maýsymda «Arsenal» men Ýels quramasynyń úzdik oıynshylarynyń biri boldy.
P.S. Baıqaǵandaryńyzdaı, mundaı jaraqattardan keıin de qaıta shaýyp ketýge bolady. Biz óz tarapymyzdan Ulan Qonysbaevtyń tezirek saýyǵyp ketýin tileımiz! Ártúrli aqparattarǵa súıensek, ol endi kemi úsh aı emdeledi.
Ázız Jumadil
Derekkóz: sportsffa.kz/kz
