Qyzylqoǵa aýdanynyń Jangeldın aýylyndaǵy qandy isti polısıa jańa beleske shyǵardy: qaza tapqan erli-zaıyptynyń kúıeý balasy Sultan Sársemálıevti halyqaralyq izdeýge jarıalady polısıa. Marqumdardyń qyzy Aqbaıan Muqanǵalıeva habar-osharsyz ketkenderdiń tizimine engizildi.
Kim izdeýde?
Qylmysqa qatysty negizgi kúdikke Sultan Sársemálıev ilikti. Onymen birge marqumdardyń qyzy Aqbaıan Muqanǵalıeva da izdestirilip jatyr. Aqbaıandy tergeý organy «habar-osharsyz ketken» retinde tirkedi.
Resmı málimet ne deıdi?
Halyqaralyq izdeý týraly egjeı-tegjeıin jarıalaı almaımyz dedi Atyraý oblysy PD-nyń baspasóz hatshysy Meıirim Erdáýlet. İzdeý álemniń barlyq elderi boıynsha júredi dep túsindirdi ol. İzdeýde júrgenderdi ustaý úshin arnaıy jedel-izdestirý toptaryn qurdy polısıa. Kúdiktiler qolǵa túsken jaǵdaıda týystar men BAQ resmı túrde habardar etiledi dedi departament.
Telefon izi men qarjy qozǵalysy
Tergeý jábirlenýshilerdiń jáne otbasy músheleriniń telefondary men SIM-kartalary ár túrli ýaqytta eldiń ár óńirinde tirkelgenin anyqtady. Bul qosymsha izdeý sharalaryn kúsheıtýge negiz berdi. Sondaı-aq beınejazbalardy taldaý arqyly jábirlenýshilerdiń shottaryndaǵy zeınetaqy jınaǵynan aqshany qaı jerde jáne kim alǵany naqtylandy.
Naýryz Muqanǵalıevtiń telefony 6 qańtardan beri óshirýli tur dep habarlady polısıa. Qazirgi ýaqytta barlyq telefondar men SIM-kartalardy izdeý jalǵasyp jatyr.
Qaýesetke núkte
Marqumdardyń úlken qyzy Mıragúl Qarabalınanyń máıiti tabyldy degen sózdi joqqa shyǵardy polısıa. Septıkterden nemese shuńqyrlardan máıit shyqty degen habarlamalar shyndyqqa janaspaıdy dep málimdedi departament. Mıragúldiń Atyraý qalasynda beınebaqylaý kameralaryna túskeni rastaldy, alaıda naqty oryndary tergeý múddesine saı jarıa etilmeıdi.
Saraptama ne kórsetti?
Áleýmettik jelidegi «tunshyqtyrdy» degen joramaldarmen qatar ózge nusqalar aıtylyp jatyr. Alaıda marqumdardyń denelerinen pyshaqpen salynǵan jaraqattar anyqtaldy dep habarlady polısıa. Dál ólim sebebi men ýaqyty sot-medısınalyq saraptama qorytyndysynan keıin naqtylanady.
Bul isti qoǵam sergek baqylap otyr. Resmı málimet shyqqan saıyn jańalyqpen bólisip otyramyz.
Bul týraly Qamshy.kz aqparat agenttigi habarlaıdy.
