Keshe saıasattanýshy, Prezıdent janyndaǵy strategıalyq zertteýler ınstıtýtynyń basshysy Erlan Karın elde oryn alǵan sońǵy lańkestik áreketterge baılanysty pikir bildirip, Qazaqstanda áleýmettik jelilerge, onyń ishinde VKontakte jelisiniń qyzmetine jekteý qoıýdy usynǵan bolatyn.
Saıasattanýshynyń usynysyna aqyn, jýrnalıs, «Aqıqat» jýrnalynyń Bas redaktory Amanhan Álimuly narazy. Aqyn mundaı «kertartpalyq Erlandaı azamatqa jaraspaıtynyn» aıtady. Bul týraly Qamshy.kz habarlaıdy.
Nazarlaryńyzǵa Amanhan Álimulynyń Erlan Qarınge óz paraqshasynda joldaǵan ushbý hatyn usynyp otyrmyz.
USHBÝ HAT
Erlan myrza, álemdik adamzat aqyl-oıynyń jemisin ári órkenıet kórsetkishin jaýyp úlgi kórsetpeý kerek, qaıta ony paıdalaný mádenıetin úıretip, jalpy, quraldyń (bul jerde Áleýmettik jelini qural dep túsineıik) jaman bolmaıtynyn, ony paıdalana bilmeıtin bilimsiz, biliksiz adamnyń jaman bolatynyn aıtyp, jazyp, oıǵa da boıǵa da sińirý kerek te, Óz tarapyńyzdan so baǵyt-baǵdarda, ustanymda jaqsy úlgi kórsetýge tıistisiz. Siz ózińizdi oqyǵan, saıasatker adam sanaıtyn azamatsyz. Kerketti, kertartpalyq Sizge jaraspaıdy. Álemdik órkenıet - adam oıynyń ozyq úlgisinen, tıimdi de paıdaly aqyl-oı jemisinen turady.Biz soǵan qol jetkizip, ózimiz de soǵan úles qosýymyz kerek. Eger, Siz onyń paıdasyn, jemisin, jaqsylyǵyn kórýdi qalamasańyz, ózgege kedergi jasamańyz. Bul jaqsy qural, so jaqsy quraldy paıdalana bilmeı, onyń paıdalaný mádenıeti men is-árekettik, baılanystyq qadyr-qasıetin sezip-bilmeıtinder qazaqty keri tartady. Álemdik órkenıet jemisiniń qyzyǵyn, paıdasyn kórýden jerindiredi. Ony qubyjyq kórsetedi. Áleýmettik jeli BAQ-tyń ozyq úlgisi. Búkil álem paıdalanyp otyrǵan qural."Ótkendi (tarıhty) pıstoletpen atsańyz, ótken Sizdi pýshkamen atady" degenge saıatyn qanatty sóz bar. Sondyqtan, Siz adamzattyń aqyl-oıynyń jemisi, ozyq órkenıettiń kórinisi Áleýmettik jelini pıstoletpen atsańyz, ol Sizdi pýshkamen atady. Onyń kúsh-qudireti sonda. Qazirgi Sizdiń jaqsyly-jamandy, azdy-kópti, barly-joqty jınaǵan bedelińiz sol BAQ-tyń ozyq úlgileriniń jemisi. Sondyqtan, Áleýmettik jelini paıdalana almaıtyn, paıdalaný mádenıetin bilmeıtin bilimsiz de biliksizder úshin, qalǵan qazaq qoǵamyn kertartpańyz, kertarpalyq kórsetpeı aıtqan sózińizdi qaıta alyńyz. Sálemmen, Amanhan Álimuly.
