Ál-Farabı atyndaǵy QazUÝ ǵalymdary men BUU, IýNESKO ókilderiniń birlesken májilisinde ýnıversıtet rektory Ǵalymqaıyr Mutanov IýNESKO-nyń bas dırektory Irına Bokovanyń qoly qoıylǵan, ýnıversıtette turaqty damý boıynsha IýNESKO halyqaralyq kafedrasynyń ashylýyn resmı túrde rastaıtyn qujatty saltanatty túrde kórsetti. IýNESKO jáne ISEKO jumystary boıynsha QR komısıasynyń bas hatshysy Ásel Ótegenova ýnıversıtettiń turaqty damý sheshimine qosqan úlesin atap ótip, Irına Bokova hanymnyń: «Turaqty damý boıynsha maqsattardy tabysty iske asyrý tek kóshbasshylardyń moınyndaǵy jumys emes, eń aldymen azamattyq qoǵamnyń jumysy».
Qazaqstan, Qyrǵyzstan, Tájikstan jáne Ózbekstan boıynsha IýNESKO klaster búrosynyń Almatydaǵy dırektory Andreı Shevelev jańa IýNESKO kafedrasynyń sapaly bilim berý, genderlik teńdik, laıyqty jumys pen ekonomıkalyq damý, turaqty qalalar, klımat ózgerisimen kúres, ekojúıelerdiń saqtalýy, turaqty damý úshin birlik pen yntymaqtastyqty alǵa tartý syndy turaqty damý maqsattaryna jetýde mańyzdy ról atqaratynyn atap ótti.
BUU-nyń Almaty boıynsha qoǵamdyq aqparat departamentiniń dırektory Vlastımıl Samek ýnıversıtetti turaqty damý boıynsha IýNESKO kafedrasynyń ashylýymen quttyqtaı otyra, QazUÝ-dyń turaqty damý boıynsha jetken jetistikteri joǵary oqý ornynyń BUU-nyń «Akademıalyq yqpal» baǵdarlamasy boıynsha jahandyq hab retindegi dárejesin 2018 jylǵa deıin uzartýǵa negiz bolǵanyn aıtty. Sonymen qatar, ol IýNESKO kafedrasynyń ashylýy – jastardyń múmkindikterin arttyryp, áleýmettik ınovasıalar men ózgeristerge, álemdik mádenıettiń qalyptasýyna óz septigin tıgizetinine senim bildirdi.
Ýnıversıtet rektory turaqty damý boıynsha IýNESKO kafedrasy demokratıalyq qundylyqtar, sonyń ishinde, toleranttylyq, plúralızm, adam quqyǵyn qurmetteý, bostandyq uǵymdary alǵa qoıylatyn pikirtalas alańy bolatynyn rastady. IýNESKO kafedrasy qyzmeti sheńberindegi jobalardy iske asyrý turaqty damý aınalasynda memleket pen aýdan áleýetin arttyrýǵa qoldaý kórsetý baǵytyndaǵy bastamalarǵa jańa serpin bolary anyq. Atap aıtqanda, bul – turaqty damý, qorshaǵan ortany qorǵaý, jasyl ekonomıka men jańartylatyn energıa berý boıynsha ǵylymı-zertteýshilik jobalardyń iske asýyna daıyndyq pen qoldaý.
Bul – Qazaqstandaǵy bilim berý, ǵylym men mádenıet jónindegi BUU-men tanylǵan besinshi IýNESKO kafedrasy, onyń ekeýi ál-Farabı atyndaǵy QazUÝ-da. 1996 jyldan beri ýnıversıtette BAQ, jýrnalısıka men medıa bilim salasynda iri jobalardy júzege asyratyn, jýrnalısıka jáne buqaramen qatynas ornatý salalary boıynsha IýNESKO kafedrasy jumys isteıdi.
