Tanymal prodúser, ánshi, telejúrgizýshi Baıan Esentaeva soqqyǵa jyǵylyp, aýrýhanaǵa túskenin buǵan deıin habarlaǵanbyz. Ánshige aýyr dene jaraqatyn saldy dep onyń kúıeýi Baqytbek Esentaev aıyptalýda. Kúdikti tergeý ızolátoryna qamaldy. Búgin sot oǵan tergeý kezinde qoldanylatyn bultartpaý sharasyn anyqtaıdy, - dep habarlaıdy Qamshy.kz.
Prodúserdiń soqqyǵa jyǵylýǵa aqparat quraldary men áleýmettik jelide úlken rezonans týǵyzdy. Qaıǵyly oqıǵany talqylaǵandardń qaı-qaısysy bolsa da Baıan Esentaevanyń tez aıyǵýyna tilektestik tanytyp, qol jumsaǵan kúdiktiniń áreketin ashyq aıyptaýda. Jeli qoldanýshylarynyń deni kelinshegine qol jumsap, dene jaraqatyn salǵan adam zańǵa saı tıisti jazasyn alýy kerek deıdi. Qoǵamdaǵy osy taqylettes turmystyq kıkiljińderdi alǵa tartyp, «Baıannyń kúıeýi aýyr jazadan qutylyp ketýi múmkin» deıtinder de bar.
Zańger Djohar Ótebekov informburo.kz saıtyna osy máselege oraı túsinik beripti. Onyń aıtýynsha, eger quqqorǵaý organdary Baqytbek Esentaevtyń kinásin tolyq dáleldep, alaıda, kelinshegi kúıeýine keshirim berse Baqytbek Esentaevtiń bostandyqta qalýy múmkin kórinedi.
«Eger aıyptaýǵa qatysty qandaı da bir ózgeris bolmasa, QR QK-niń 106-baby (Densaýlyqqa qasaqana aýyr dene jaraqatyn salý) qoldanylatyn bolady. Ol bap 3 jyldan 7 jylǵa deıin bas bostandyǵynan aıyrý nemese bostandyǵyn shekteý jazasy kózdelgen. İs júzinde eger taraptar ymyraǵa kelse, kóbinese bas bostandyǵyn shekteý qoldanylyp jatady. Sottalýshyny sot zardap shegýshimen tatýlasqany úshin qylmystyq jaýapkershilikten bosatpaıdy. Iaǵnı, bul quqyqtyq-qylmystyq maǵynadaǵy tatýlasý bolyp tabylmaıdy, soǵan qaramastan zardap shegýshiniń ótinishi is júzinde mindetti túrde eskeriletin bolady», - degen zańger kúdiktige naqty bas bostandyǵynan aıyrý jazasy belgilenbeýi múmkin ekenin aıtady. Onyń oıynsha, sot aıyptalýshyǵa 3-4 jylǵa bas bostandyǵyn shekteý jazasyn qoldanýy múmkin.
Zańger sondaı-aq, sot prosesiniń jabyq túrde ótýine de eshqandaı sebep kórip turmaǵanyn aıtady.
Esterińizge salsaq, prodúser Baıan Esentaeva ótken juma kúni Almaty oblysy Talǵar aýdany aýmaǵynda soqqyǵa jyǵylyp, qazir aýrýhanada jatyr. Al, onyń kúıeýi Baqytbek Esentaevti polısıa kúdikti retinde qamaýǵa alǵan. Talǵar aýdandyq İİB habarlaýynsha, kıkiljiń kezinde prodúserdiń kúıeýi ishimdikke mas bolǵan kórinedi.
Dárigerler jabyq bas-mı jaraqaty, paraorbıtaldy gematoma, birneshe ishekti zaqymdaǵan qaryn tusynyń pyshaq jaraqaty syndy dıagnoz qoıǵan prodúserdiń densaýlyǵy turaqty aýyr kúıde qalyp otyr. Dárigerler onyń basy men keýdesin tomografıaǵa túsirgen. Aq halattylar qazir jansaqtaý bóliminde jatqan Baıan Esentaeva aýrýhanada kemi 10 kún bolatynyn aıtýda.
